सिरहाः ट्रयाक्टर दुर्घटना हुँदा २ युवकको मृत्यू, ५ घाईते !

न्यूज ब्यूरो, सिरहा । सिरहामा आज दिउँसो ट्रयाक्टर दुर्घटना हुँदा २ जनाको मृत्यू भएको छ भने अन्य ५ जना घाईते भएका छन् ।

सिरहाको गोलबजार नगरपालिका वडा नं. ७ को पूर्व पश्चिम राजमार्ग अन्तर्गत पुरानो चोहर्बा चोकमा ट्रयाक्टर दुर्घटना भएको ईलाका प्रहरी कार्यालय गोलबजारले जनाएको छ । सो दुर्घटनामा परी २ जना गम्भिर घाईते भएकोमा उपचारको क्रममा लहान लैजाँदै गर्दा बाटोमै मृत्यू भएको प्रहरीले जनाएको छ ।

आज (शनिबार) दिउँसो १२ः३० बजेको समयमा जन्ती (बाराती) बाट फर्किदै गरेको अवस्थामा स १ त ६५६० नम्बरको ट्रयाक्टर दुर्घटना हुँदा घटना भएको ईलाका प्रहरी कार्यालय गोलबजारका प्रहरी नीरिक्षक (ईन्सपेक्टर) जनक पुरीले जानकारी दिनुभयो । पुरीका अनुसार पूर्वपश्चिम राजमार्ग अन्तर्गत पूर्वबाट पश्चिम तर्फ आईरहेको डिजे लोड गरिएको ट्रयाक्टर दुर्घटना भएको हो ।

तीव्र गतिमा डिजे बोकेर आउँदै गरेको ट्रयाक्टरले बीच राजमार्गमा आएको एक बाख्रालाई जोगाउन खोज्दा अनियन्त्रित भएर दुर्घटना भएको प्रहरीले जनाएको छ । दुर्घटना भएपछि ट्रयाक्टरमा लादिएको डिजे (साउण्ड बक्स बाजा) ले टाउकोमा गम्भिर चोट लागेपछि सिरहाको लहान नगरपालिका वडा नं. १३ बस्ने अन्दाजी बर्ष २१ का सँतोष कुमार यादव र सिरहाकै धनगढी नगरपालिका वडा नं. १२ बस्ने अन्दाजी बर्ष २२ का श्रीप्रसाद मण्डलको मृत्यू भएको हो ।

उनीहरुलाई टाउकोमा गम्भिर चोट लागेपछि उपचारको लागि लहानतर्फ लैजाँदै गर्दा बाटोमै मृत्यू भएको प्रहरीले जनाएको छ । त्यही दुर्घटनामा परी अन्य ५ जना समान्य घाईते भएको हो । उनीहरुको समान्य उपचार पछि घर फर्काइएको छ । डिजे बोकेको उक्त ट्रयाक्टरमा १३ जना सबार रहेको थियो ।

मृतक दुवै जनाको शव (लास) लहान स्थित रहेको रा.उ. स्मारक अस्पताल लहानमा राखिएको छ । दुवै जनाको पोष्टमार्टमपछि शव परिवारलाई जिम्मा लगाउने प्रहरीले जनाएको छ । यता, ट्रयाक्टर र चालक भने प्रहरीको नियन्त्रणमा रहेको छ ।