पत्रकार–मेयर प्रकरणमा दोषीलाई कारवाहीको माग गर्दै यानको प्रदर्शन

न्यूज ब्यूरो, जनकपुरधाम । गत मंगलबार जनकपुरका सँचारकर्मी–मेयरबीच भएको हातपातको घटनाका दोषीलाई कारवाहीको माग गर्दै युथ एशोसिएशन अफ नेपाल (यान) का युवाहरुले प्रर्दशन गरेका छन् ।

जनकपुरको जनकचोकमा विहिबार अपरान्ह यानका केन्द्रिय सदस्य आदित्य नेपालको अगुवाईमा दोषीलाई कारवाहीको माग गर्दै प्रदर्शन गरेको हो । उनीहरुले आफूहरु पत्रकार वा मेयर कसैको समर्थन वा पक्षमा आवाज नउठाएको भन्दै सत्यतथ्य छानबिन गरी त्यस घटनाको दोषी जोकोहीलाई कारवाहीको माग गरेको हो ।

युवाहरुले सूचनाको हक कार्यान्वयन गर, पत्रकार कुटने मेयरलाई कारवाही गर लगायतका नारा लगाउंँदै प्रदर्शन गरेका हुन् । जानकी मन्दिरको फूलबारी जग्गाको अतिक्रमण सम्बन्धमा प्रतिक्रिया लिने जाने पत्रकारलाई घण्टौ कुराएर आफ्नो कार्यकर्ता तथा गुण्डा लगाएर पत्रकार उपर हातपात गरेको आरोप लगाइएको छ । यानका आदित्य नेपालले मेयर साहले आफ्नो भ्रष्टाचार लुकाउन खोजेको आरोप लगाउनुभयो ।

यता, नेपाली काँग्रेस निकट तरुण दलका कार्यकर्ता सर्वजीत यादवले भ्रष्टाचारलाई पर्दाफास गर्ने देशकै चौथो अंग पत्रकार जनप्रतिनिधिबाट कुटिनुको अर्थ यहाँका जनता र सेवाग्राही सुरक्षित नरहेको प्रतिक्रिया दिए ।