मैथिलि विकास कोषको अध्यक्षमा 'चौधरी' तेस्रो पटक चयन

न्यूज ब्यूरो, जनकपुरधाम । मैथिली भाषा विकास हेतु स्थापना गरिएको मैथिली विकास कोषको अध्यक्षमा फेरी पनि जीवनाथ चौधरीलाई चयन गरिएको छ ।

कोषको शनिवार सम्पन्न भएको साधारण सभाबाट चौधरीलाई अर्को कार्यकालको लागि अध्यक्षको रुपमा चयन गरिएको हो । यसै गरी श्यामसुन्दर शशि पुन : सदस्य सचिव चयन भएका छन् । चौधरीलाई तेस्रो कार्यकालको लागि अध्यक्षको जिम्मेवारी दिइएको हो ।

कार्यसमिति चयनका लागी साहित्यकार एवम् नाटककार रमेश रञ्जन झा, साहित्यकार रामभरोस कापडि, राजनीतिकर्मी रोशन जनकपुरी, राजनीतिकर्मी रामसरोज यादव तथा मिथिला मधेशका प्रसिद्ध लोक गायक सुनिलकुमार मल्लिक सहितको अध्यक्ष मण्डलको निर्णयबाट चौधरीलाई तेस्रो कार्यकालको जिम्मेवारी तोकिएको हो । अध्यक्ष मण्डलले साधारण सदस्यहरुसंगको छलफल पछि नया कार्यसमितिको नाम प्रस्ताव गरेका थिए । जसलाई साधारणसभाले सर्वसमितिले अनुमोदन गरेको थियो ।

यसअघि दुई कार्यकाल सम्हालेका चौधरी तेस्रो कार्यकालको लागि जिम्मेवारी बहन गर्ने भएको छ । प्रत्येक ३/३ वर्षमा हुने नयाँ कार्यसमितिको लागि यसअघि नै ६ वर्षको दुई कार्यकाल सफलतापूर्वक सम्हालेका चौधरी तेस्रो कार्यकालको लागि अध्यक्षमा चयन भएपछि बधाईको ओइरो लागेको छ ।

सर्वसमितिबाट भएको नयाँ कार्यसमिति चयनमा नविन कुमार मिश्र, नित्यानन्द मण्डल, सुजित कुमार झा, पूनम झा मैथिली, अनितारानी मण्डल, विष्णुकान्त मिश्र तथा रामचन्द्र दास सदस्य चयन भएका छन् । १३ सदस्यीय कार्यसमितिका अन्य सदस्यहरु पछि मनोनित गरिने अध्यक्ष चौधरीले जानकारी दिनुभयो ।

दुई मैथिली भाषी स्रष्टालाई सम्मान तथा पुरस्कार

मैथिली भाषा,साहित्य,कला,संस्कृतिको क्षेत्रमा उल्लेखनीय योगदान दिदै आएको मैथिली विकास कोषको शनिवार सम्पन्न १८ औं वार्षिकोत्सव तथा पुरस्कार अर्पण समारोहमा मैथिली साहित्य तथा संस्कृतिको क्षेत्रमा काम गर्ने एक स्रष्टा तथा एक संस्था गरी दुई जनालाई पुरस्कृत गरिएको छ ।

प्रदेश ५ को बुटवलमा रहि मैथिली भाषा,साहित्य तथा संस्कृतिको क्षेत्रमा विगत डेढ दशकदेखि काम गर्दै आएको मैथिली समाज बुटवल तथा साहित्यकार प्रा. डा. सुरन्द्र लाभलाई पुरस्कृत गरिएको हो । समाजलाई सलहेस सांस्कृतिक पुरस्कार तथा लाभलाई डा. धीरेन्द्र साहित्य संस्कृति पुरस्कार प्रदान गरिएको थियो । प्रदेश २ का प्रदेश प्रमुख तिलक परियारले दुबै जनालाई जनही ५१ ह्जार नगद, प्रस्तीपत्र तथा दोसल्ला ओढालएर पुरस्कृत गर्नुभएको हो । वार्षिकोत्सवको अवसरमा कोष प्रत्येक वर्ष दुई स्रष्टालाई पुरस्कृत गर्दै आएको छ ।

प्रदेश प्रमुख परियारले मैथिली प्राचिन तथा मिठो भाषा भएको उल्लेख गर्दै यसको विकासमा प्रदेश सरकार सक्दो सहयोग गर्ने बताउनुभयो । उहाँले अधिकारको प्राप्ति फुटेर भन्दा पनि एक ढिका भएर रहने बताउनुभयो ।