महेन्द्रनगरमा पुनः शंकास्पद  वस्तु फेला, सेना र सिडिओ टोली स्थलमा  !

न्यूज ब्यूरो, जनकपुरधाम । धनुषाको महेन्द्रनगरमा पुनः शंकास्पद वस्तु फेला परेपछि स्थानीयहरु त्रसित भएका छन् ।

क्षीरेश्वरनाथ नगरपालिका वडा नं. ५ महेन्द्रनगर बजारमै एनआईसी एसिया बैंक नजिकै बोरामा हिजोदेखि नै शंकास्पद वस्तु राखिएको ईलाका प्रहरी कार्यालय महेन्द्रनगरले जनाएको छ । उक्त बोरामा कुनै विस्फोटक पदार्थ अथवा बम हुन सक्ने आशंकामा स्थानीयहरुलाई त्यहाँबाट सचेत गराई त्यो क्षेत्रमा नाकाबन्दी गरिएको प्रहरीले जनाएको छ ।

एनआईसी एसिया बैंक र न्यूज ब्यूरोको महेन्द्रनगर शाखा नजिकै उक्त शंकास्पद वस्तु फेला परेको धनुषाका प्रमुख जिल्ला अधिकारी प्रदीपराज कनेलले जानकारी दिनुभयो । उहाँका अनुसार, हिजोदेखि नै शंकास्पद एवम् बेबारिसे बोरा फेला परेपछि बमको आशंकामा स्थानीयलाई सचेत गराइएको हो ।

उक्त बोरा शंकास्पद भेटिएपछि नेपाली सेनाको टोली समेत उक्त स्थल पुगेको प्रजिअ अधिकारीले जानकारी दिनुभयो । उक्त बोरामा के छ भनेर चेकजाँच गर्नको लागि नेपाली सेनाको बम डिस्पोजल टोली त्यहाँ पुगेर अनुसन्धान गरिरहेको जानकारी दिनुभयो ।

केही दिन अघि मात्र महेन्द्रनगरमा बम विस्फोटमा परी प्रहरी नीरिक्षक सहित ३ जनाको मृत्यू भएको थियो । यसबारे थप अपडेट आउन बाँकी छ ।