जेलमै कैदी कुर्मीको मृत्यू !

न्यूज ब्यूरो, रौतहट । हातहतियार खरखजाना मुद्दा अन्तर्गत पुर्पक्षका लागि गौर कारागारमा रहेका नकुल राउत कुर्मीको उपचारको क्रममा आईतवार विहान मृत्यु भएको छ ।

जिल्ला प्रहरी कार्यालय गौरका अनुसार पुर्पक्षको लागि गौर कारागारमा रहेका कुर्मी विगत केही समय देखि लिवरको विरामी रहेको सोही क्रममा नारायणी उप क्षेत्रिय अस्पताल विरगंजमा उपचार भईरहेका थिए । कुर्मीको अवस्था गम्भीर भएपछि जिल्ला अस्पताल गौरमा सामान्य उपचार गरेर थप उपचारको लागि गत पुस ८ गते नारायणी उप क्षेत्रिय अस्पताल विरगंज लगिएको थियो ।

उपचारकै क्रममा आज विहान कुर्मीको ज्यान गएको हो । गौर नगरपालिका वडा नम्वर ४ स्थायी घर भएका कुर्मीलाई २०७५ माघ १५ गते दिउसो ४ बजेको समयमा इशनाथ नगरपालिका वडा नम्वर १ लाल बकैया नदीको बगरबाट नेपाल प्रहरीले अटोमेटिक पेस्तोल १ थान, कटुवा बन्दुक १ थान र गोली ५ राउण्ड सहित पक्राउ गरेको डिएसपी नविन कार्कीले बताए ।

हातहतियार खर खजाना एवं हतियार ओसारपसार मुद्दामा जिल्ला अदालत गौरबाट २०७५ फागुन १० गते पुर्पक्षका लागि गौर कारागार चलान भएको जानकारी दिदै डिएसपी कार्कीले केही समय देखि कुर्मीलाई लिवरमा इन्फेक्सन भएको हुँदा उपचार नियमित भइरहदा पनि निजको आज विहान उपचारकै क्रममा मृत्यु भएपछि आवश्यक प्रक्रिया पुरा गरेर शवलाई शतगत गर्न उनको परिवारलाई जिम्मा लगाउने तयारी गरिएको उनले भने ।