सिरहा : सुन भनेर अन्य धातु बेच्ने २ जना पक्राउ

न्यूज ब्यूरो, सिरहा । सिरहा प्रहरीले सुनको जलप लगाई अन्य धानु बिक्री गरी ठगी गरेको आरोपमा दुईजनालाई पक्राउ गरेको छ ।

ईलाका प्रहरी कार्यालय मिर्चैयाबाट खटिएको प्रहरी टोलीले सुनका रुपमा अन्य धानु बिक्री गरी ठगी गरेको आरोपमा बुधबार साँझ दुई जनालाई पक्राउ गरेको हो । पक्राउ पर्नेमा धनुषाको गणेशमान चारनाथ नगरपालिका–९ बरमझिया निवासी ३० वर्षीय कुलदीप कुमार गडेरी र सवैला नगरपालिका– १० मखनाहा निवासी २५ वर्षीय प्रदीप साह रहेका छन् ।

पक्राउ परेका दुवै जनाले मिर्चैया नगरपालिका–६ स्थित राधाकृष्ण ज्वेलर्स र शिव ज्वेलर्समा सुनका रुपमा अन्य धातुको लकेट बिक्री गरी चाँदीका बाला लिएका थिए । बाँकी रहेको वस्तुसमेत लिएर जाने बेलामा लकेटको सुन परीक्षण गर्दा सुनको जलपमात्र भएको खुलेको ईलाका प्रहरी कार्यालय मिर्चैयाका प्रहरी नायव उपरिक्षक सन्तुलाल चौधरीले जानकारी दिए ।

राधाकृष्ण ज्वेलर्स सञ्चालक देवकृष्ण साह र शिव ज्वेलर्सका सञ्चालक सन्तोष महतोले उजुरी दिएपछि प्रहरीले पक्राउ गरेको डिएसपी चौधरीले जनाए ।