जनकपुरको मोनाष्टिक स्कुललाई 'अन्तर्राष्ट्रिय स्कुल अवार्ड'

न्यूज ब्यूरो, जनकपुरधाम । प्रदेश नं. २ को शहरी नीजि विद्यालयहरुमा उत्कृष्ट विद्यालयको रुपमा स्थापित जनकपुरको मोनाष्टिक आवासीय माध्यमिक विद्यालय अन्तराष्ट्रिय अवार्ड हाँसिल गर्न सफल भएको छ ।

गत सोमबार युएईको दुबई स्थित रहेको अमिटि विश्वविद्यालयमा सम्पन्न अन्तराष्ट्रिय अवार्ड समारोहमा नेपालबाट प्रदेश नं. २ को जनकपुरको पुरानो नीजि विद्यालय मोनाष्टिकले अन्तराष्ट्रि स्कूल पुरस्कार पाउन सफल भएको हो । मोनाष्टिक स्कूलले "Best School Promoting Extra Curricular Activity INTERNATIONAL SCHOOL AWARDS-2019" प्राप्त गर्न सफल भएको हो ।

भारतीय प्रधानमन्त्री नरेन्द्र मोदीका विशेष सल्लाहकार डा. दीपक बोहरा र अफगानिस्तानका डा. अताउल्लाह वाहिद्यारले मोनाष्टिक स्कुलका मेनेजिङ डायरेक्टर डा. सोनु कुमार साहलाई उक्त अवार्ड हस्तान्तरण गर्नुभएको हो ।

जनकपुरधाममा मात्र नभई नेपालको शिक्षा क्षेत्रमा गुणस्तरीय शिक्षाको लागि चिनिएको मोनाष्टिक स्कूलले अन्तराष्ट्रिय स्तरको अवार्ड पाउन सफल भएपछि मोनाष्टिक स्कूलको कर्मचारी, शिक्षक शिक्षिका र विद्यार्थीहरुको हात रहेको बताउनुभयो । उहाँले मोनाष्टिकका सँस्थापक एवम् जन्मदाता स्वर्गीय डा. मिथिलेश साहको देनले पनि अन्तर्राष्ट्रिय स्कुल अवार्ड हात पारेको बताउनुभयो ।

उहाँले भन्नुभयो, – “यो अवार्डले मोनाष्टिक स्कुलको उचाइ त थपिएकै छ,साथै देशमा गुणस्तरीय शिक्षा दिइन्छ भन्ने सन्देश पनि प्रवाह भएको छ। मोनाष्टिक स्कुल मात्र नभई नेपालका हरेक स्कुल यस्ता अवार्ड पाउन दाबी गर्न सक्ने बन्नुपर्छ ।”

डा. साहले नेपालका सबै स्कुलले गुणस्तरीय शिक्षामा जोड दिनुपर्ने बताउनुभयो। सो अवार्ड समारोहमा नेपाल, भारत, श्रीलङ्का, यूएई, चीन, ताइवान, बङ्गलादेश, पाकिस्तान आदि देशको सहभागीता रहेको थियो । जनकपुरको मोनाष्टिक स्कूल पठनापाठनको नीति, शिक्षा नीतिसँगै प्रविधिको विकासँगै निरन्तर सँचालन हुँदै आएको छ ।