'बरु डोजरमै किचिएर मर्छौ, तर जग्गा खाली गर्दैनौं' !

न्यूज ब्यूरो, जनकपुरधाम । धनुषामा विगत ४ दशकदेखि एउटै ठाउँमा बसोबास गर्दै आएका केही भूमिहिन (जग्गाको कागजात नभएको तर वासोवास गर्दै आएको) दलित समुदायले जमिन खाली गर्न भनेपछि मर्न तयार रहेको बताएका छन् ।

अदालतको निर्णयपछि दशकौंदेखि बसोबास गर्दै आएको जग्गालाई खाली गराउन जनप्रतीनीधिहरुले नै अन्याय गर्न लागेको भन्दै जग्गामा डोजर चले डोजरमै किचिएर मर्ने चेतावनी दिएका हुन् । उनीहरुले आफूहरु मरेर भएपनि जग्गा खाली नगर्ने अडानमा रहेका छन् । स–साना बालबालिका, शिशुहरुलाई लिएर शितलहरमा छटपटाएर मर्नुभन्दा सबैजना डोजरमै किचिएर मर्ने चेतावनी दिएका छन् ।

धनुषाको विदेह नगरपालिका वडा नं. १ ठाढी झिझा स्थित रहेको ऐलानी जग्गा (सार्वजनिक जग्गा) मा विगत ४० बर्षदेखि त्यहाँका सहनी समुदाय सहित अन्य भूमिहिन घर परिवारले बसोवास गर्दै आएकोमा व्यक्तिगत रिसबीका कारण उनीहरुलाई जग्गा खाली गराउन लागेका हुन् । यद्यपी उनीहरुलाई मँसिर ३० गतेसम्म जग्गा खाली गर्न अल्टिमेटम दिएपनि स्थानीय जनप्रतिनीधिको सहयोगमा जग्गा खाली गर्ने कार्य तत्काल स्थगित गरिएको हो ।

विगत चार दशक देखि ठाडी टोलमा रहेको पोखरीको एलानी जग्गामा बसोबास गर्दै आएका मजदुरी गरेर छाक टार्दै आएका सहनी समुदायहरु अदालतको आदेश पछि घरबार विहिन हुने अवस्था आएको नगरपालिकाका नगर प्रमुख बेचन दासले बताउनुभयो । उहाँका अनुसार, अदालतले आदेश दिएपनि केही समयको लागि जग्गा खाली गर्ने कार्य रोकिएको हो । बासिन्दाहरुको अर्को स्थायी व्यवस्था नहुन्जेलसम्मको लागि स्थगित गरिएको बताउनुभयो ।

उहाँले वडा नं. १ का वडाध्यक्ष रामवृक्ष ठाकुरले भूमिहिन दलित गरिबहरुलाई विस्थापित गर्न खोजेको आरोप लगाउनुभएको छ । न्यूज ब्यूरोसँग कुराकानी गर्दै मेयर दासले वडाध्यक्षकै भाई पर्ने स्थानीय राम सागर ठाकुरले व्यक्तिगत रिसबी कारण अदालतमा मुद्दा दिएर खाली गराउन लागेको आरोप लगाउनुभयो । ती जमिनका बासिन्दाहरुलाई वडाध्यक्ष ठाकुरले नै प्रलोभनमा पारेर मुद्दाको तारेख नलिन बताएपछि अदालतले जग्गा खाली गर्ने आदेश दिएको बताइएको छ ।

ठाढिमा रहेको सरकारी विद्यालयको पोखरीको करिव ४ कठठा जग्गा रहेको पुर्व र उत्तर पटीको जग्गामा पुर्खौदेखि बस्दै आएका उनिहरुलाई वडाध्यक्षका भाई राम सागर ठाकुरले जग्गा घिचौला मुद्दा दिएर उनिहरुलाई घरवार विहिन बनाउन प्रपँच थपेको लगाइएको छ । पुस्तौ देखि वस्दै आएका सो एलानी जग्गामा दलित परिवारका करिव १५ घर रहेको छ जसमा सय परिवार बसोबास गर्दै आएको छ ।

सोहि बस्तीमा बस्दै आएका इन्दु ठाकुर बरहीका अनुसार एलानी बस्तीकै बगलमै नीजी जग्गा किनेर बस्दै आएका रामसागर ठाकुरले बस्तीका लागि प्रयोग गरिदै आएको बाटोलाई मिचेर पर्खाल वनाउन कोशिस गर्दा रोक लगाएपछि रिसवी सादेको बताउनुभयो । उहाँ सोहि विषयलाई रिसिवी गरेर अदालतमा एलानी जग्गामा हकभोग गरेको भन्दै जग्गा खिचौलाको मुद्दा दिएको आरोप लगाउनुभयो ।

प्रतिउत्तर लगाउदा ठाकुरकै दाई रामवृक्ष ठाकुर वार्ड अध्यक्षमा जितेपछि मुद्दामा नलडनका लागि भन्दै सबैलाई बसेकै ठाउँमा जग्गा मिलाईदिने प्रलोभन देखाएपछि उनीहरु तारेख धाउन छाडेको भुमीहिन समेत रहेका स्थानीय एक जनाले नाम खोल्ने शर्तमा बताउनुभयो । पछि रामसागर ठाकुरले मुद्दालाई जारी नै राखेर अदालतबाट मुद्दा जिती आफुहरुलाई पुर्खौ देखि बस्दै आएको जग्गाबाट अन्य ठाउँमा भौतारिन बाध्य बनाएको दुखेसो पोखे ।

उक्त जग्गामा धनुषा जिल्ला अदालतले गत २०७६ जेष्ठ ८ गते आदेश जारी गर्दै एलानी जग्गा खाली गराउन निर्णय गरेको हो । वस्तीबासीलाई मंसिर ३० गते सम्म जग्गा खाली गर्न अन्तिम चेतावनी दिइएको छ भने सो समयमा खाली नगरे डोजर लगाएर घर भत्काउने भनेर चेतावनी समेत दिइएको छ ।

यता सो सम्वन्धमा वार्ड नं १ का वार्ड अध्यक्ष रामवृक्ष ठाकुरले भूमिहिनहरुलाई जग्गा खाली गराउन आफुले पनि नचाहेको बताउनुभयो । उहाँले उनीहरुलाई सोहि ठाउँमा पुनः बसाउनका लागि पहल गरिरहेको बताउनुभयो । “आफुले तत्कालका लागि घरवार विहिन नबनाउन सम्वन्धित निकायलाई आग्रह गरिसकेको छु, नगरपालिकाको वोर्ड बैठकबाट भुमीहिनहरुको लागि जग्गाको व्यवस्था गरि समस्या सामाधान गर्नेछु’।– उहाँले भन्नुभयो ।

उहाँले यस्तो हिउँदको समयमा घरवार विहिन वनाउन नहुनेमा आफनो जोड रहेको र यसको लागि पहल गरिरहेको समेत बताउनुभयो । सो वस्तीमा वस्दै आएका भुमीहिन दलितहरुका अनुसार आफुहरुले कुनै पनि हालतमा सो वस्तीबाट नहटने बरु डोजर चलाए त्यसैमा किचिएर मर्ने बताएका छन् ।

पुर्खौ देखि वस्दै आएको जग्गा छाडनुपरे सरकारले हामी भुमीहीनहरुको व्यवस्था गर्न समेत उनिहरुले माग गरे।