बम विस्फोटमा ज्यान गुमाएकाप्रति जनकपुरमा 'कैंण्डल मार्च'

न्यूज ब्यूरो, जनकपुरधाम । गत शुक्रबार धनुषाको महेन्द्रनगरमा भएको बम विस्फोटमा परी ज्यान गुमाएकाहरुप्रति श्रद्धाञ्जली दिन कैंण्डल मार्च गरिएको छ ।

युथ एसोसिएसन अफ नेपाल (यान) र जिल्ला युवा संजाल धनुषाको संयुक्त आयोजनामा शुक्रबार राती भएको शक्तिशाली बम विस्फोटमा परी अल्पायूमै ज्यान गुमाएका एक सुरक्षा निकायका प्रमुख, एक विद्यार्थी तथा एक अभिभावकप्रति दीप प्रज्वलन कार्यक्रम जनकपुरको जानकी मन्दिरमा गरिएको हो । सो बिस्फोटमा परि ज्यान गुमाएका राजेश्वर साह, आनन्द साह र प्रहरी निरीक्षक अमिर दाहाल प्रती श्रद्धाञ्जली अर्पण गरिएको हो ।

जानकी मन्दिर बाट सुरुवात भएका कैन्डल मार्च सोनारपटी हुँदै जनकचौकसम्म पुगेर कोणसभामा परिणत भएको थियो । सो कोण सभालाई सम्बोधन गर्दै यानका सदस्य शिवा सिंहले दोषीलाई यथाशिघ्र कडा भन्दा कडा सजाय दिन माग समेत गरे । उनले भने, “यसरी दिन प्रति दिन बढ्दै गएको हिंसात्मक घटनाले मानिस त्रासमा छन। प्रदेश न २ को शान्तीसुरक्षा माथी प्रश्न उठेको छ। आखिर के गरेर बसेका हुन्छन यहाँका सुरक्षा निकाय ?”

उक्त कार्यक्रममा यानका कोषाध्यक्ष नेमत खान, सचीव पपु राय, सदस्य राहुल मण्डल, कुश यादव, सुजित साह लगायतका युवाको उपस्थिति थियो भने संजालका महासचिव कुलदिप साह , खुसबु साह लगायतका युवा युवतीहरुको उपस्थिति रहेको थियो।