बैंकले ऋण प्रवाहको सुविधा सरल बनाउनुपर्छ : मन्त्री यादव

न्यूज ब्यूरो, जनकपुरधाम । प्रदेश २ का आन्तरिक मामिला तथा कानूमन्त्री ज्ञानेन्द्र कुमार यादवले सिद्धार्थ बैंकले धनुषावाट केवल निक्षेप संकलन नगरि कृषि तथा उद्योग क्षेत्रको विकासका लागि ऋण प्रवाह गर्ने आशा व्यक्त गरेका छन् ।

जनकपुरधामको रामानन्द चौकमा सिद्धार्थ बैंक लिमिटेडको शुक्रबार तेश्रो शाखाको उदघाटन गर्दै मन्त्री यादवले धनुषा जिल्लाबाट वैदेशिक रोजगारीमा युवाहरु अत्यधिक संख्यामा गएकाले रेमिट्यान्स संकलनका लागि मात्र बैंक तथा वित्तिय संस्थाको आकर्षण हुन नहुने बताउँदै उत्पादनमूलक क्षेत्रमा ऋण प्रवाहको काममा पनि प्राथमिकता दिनुपर्ने खाँचो रहेको बताए ।

तीन महिना अगाडी देखि नै अनौपचारिक रुपमा जनकपुरधामको रामानन्द चौकमा नगरक्षेत्रको तेश्रो तथा देशमा १ सय ७६ औं शाखाको रुपमा सञ्चालनमा आईसकेको र ७ सय ५० भन्दा बढी ग्राहकहरु कारोवारमा जुटिसकेको बैंकका शाखा प्रबन्धक अजय कुमार यादवले जानकारी दिए । ‘क’ वर्गको वैंकले गर्नुपर्ने सबै कारोवार रामानन्द चौकमा रहेको सिद्धार्थ बैंकको शाखाले गरिरहेको बताउँदै उनले बैंकले तीन महिनाको अवधिमा ७ करोड भन्दा बढीको कारोवार गरेको जानकारी दिए ।

कार्यक्रममा सिद्धार्थ बैंक लिमिटेडको प्रदेश २ प्रमुख हरिप्रसाद तिम्सिनाले जनकपुरधामका ग्राहकहरुको अत्यधिक माया तथा स्नेहका कारणले उपमहानगर क्षेत्रमा तीन वटा शाखा सञ्चालनमा आउनु सुखद रहेको धारणा राखे । यसअघि सिद्धार्थ बैंकको जनकपुरधामको मिल्स एरिया र मुरली चौकमा शाखा सञ्चालनमा रहेको छ ।

बैंकको रामानन्द चौक शाखाका प्रबन्धक अजय कुमार यादवको अध्यक्षतामा भएको कार्यक्रममा जनकपुर क्षेत्रका उद्योगी, व्यवसायी, निर्माण व्यवसायी सहित सामाजका विभिन्न क्षेत्रका व्यक्तिहरु उपस्थित थिए ।