सिरहाबाट ब्राउन सुगरसहित चारजना फन्दामा

न्यूज ब्यूरो, सिरहा । सिरहाबाट ब्राउन सुगरसहित ४ जना युवक पक्राउ परेका छन् ।

सिरहाको गोलबजार नगरपालिकाबाट ब्राउन सुगरसहित प्रहरीले ४ युवक पक्राउ गरेको हो । विशेष सूचनाको आधारमा ईलाका प्रहरी कार्यालय गोलबजारका प्रमुख इन्सपेक्टर जनक पुरीको कमाण्डमा खटिएको टोलीले मंगलबार राती दुई जनालाई गोलबजार–३ बाट ८ पोका ब्राउनसुगरसहित फन्दामा पारेका हुन् ।

उनीहरुले नै दिएको सूचनाको आधारमा गोलबजार–६ बाट थप दुई जना गरी चार जनालाई पक्राउ गरिएको प्रहरीले जनाएको छ । पक्राउ पर्नेहरुमा गोलबजार ६ का १८ वर्षीय बालकृष्ण साह, गोलबजार ३ का १८ वर्षीय मनिष श्रेष्ठ, २२ वर्षीय विमलकुमार साह र उनका भाई १८ वर्षीय निलमकुमार साह रहेका छन् ।

प्रहरीले गोलबजार ३ मा उनीहरुले दिएको सूचनाको आधारमा बिमल र उनका भाइ निलमलाई ७३ पोकामा प्याक गरिएको ब्राउनसुगर बरामद गरिएको प्रहरी निरीक्षक पुरीले जानकारी दिए । ८१ पोका ब्राउनसुगरसहित पक्राउ परेकाहरुलाई गोलबजार प्रहरीमा राखेर थप अनुसन्धान गरिरहेको उनले जनाए ।