१०८ वर्षका बृद्धले पनि भोट खसाले !

न्यूज ब्यूरो, महोत्तरी । महोत्तरीको पिपरामा आज सम्पन्न भएको उप निर्वाचनमा १ सय ८ वर्षका एक वृद्धले पनि मतदान गरेका छन् ।

महोत्तरीको पिपरा गाउँपालिकाको अध्यक्षको लागि आज सम्पन्न भएको उपनिर्वाचनको क्रममा रतौली बस्ने १ सय ८ बर्षिय निरञ्जन साह सुडीले मतदान गरेका हुन् । विहान ७ बजेदेखि सुरु भएको मतदानको क्रममा सुडी पनि मतदान गरेका हुन् । सुडी गाउँकै जेष्ठ नागरिक अर्थात सबभन्दा बढी उमेरका हुन् ।

स्थानीय तहको चुनावमा १ सय ८ बर्षिय सुडी करिब २३ बर्ष अगाडी पनि सहभागीता जनाएका थिए भने विभिन्न चुनावमा भोट खसाल्दै आएका हुन् । आफ्नो मतको महत्व बुझदै जसरी पनि मतदान गर्न जाने भन्दै उनका नातीले उनलाई मतदान स्थल लगेका थिए । रतौली मावि मतदान केन्द्रमा सुडीले मतदान गरेका हुन् ।

महोत्तरीको पिपरा गाउपालिकाको अध्यक्षको मृत्यु भए पछि सो गाउँपालिकामा उपनिर्वाचन सम्पन्न भएको हो । गाउपालिकाको अध्यक्ष पदका लागि स्थानीय उपनिर्वाचनका लागि नेकपाबाट विक्रम चौधरी , जनमत पार्टीबाट अञ्जली देवी मण्डल, कांग्रेसबाट विजय यादव, सामाजवादी पार्टी बाट रामजानकी यादव र राजपाबाट रमिता चौधरी अध्यक्ष उमेदवारी दिएका हुन् ।

मतगणना भने आजै बेलुका देखि सुरु गरिने जनाइएको छ ।