नगरपालिकामा बम ?

न्यूज ब्यूरो, सिरहा । सिरहा जिल्लाको एक नगरपालिका कार्यालय अगाडी शंकास्पद वस्तु फेला परेपछि बमको आशंका गरिएको छ ।

सिरहाको धनगढीमाई नगरपालिकाको कार्यालय अगाडी शंकास्पद वस्तु फेला परेपछि बम हुन सक्ने आशंका गरिएको छ । बमको आशंकामा नेपाली सेनाको बम डिस्पोज टोली नगरपालिका कार्यालय पुगेको हो । नगरपालिकाको मुख्य द्धारमै रातो झोलामा बेरिएर वस्तु राखिएको छ भने त्यसमा बम हुन सक्ने आशंका गरिएपनि यकिन गर्न सकिएको छैनन् ।

जिल्ला प्रहरी कार्यालय सिरहाका प्रहरी प्रवक्ता एवम् डिएसपी अपिल राज बोहराले शंकास्पद वस्तु फेला परेको जनाउँदै बम नै भएको भनेर अहिले यकिन नभएको बताएका छन् । "शंकास्पद वस्तु फेला परेको छ । नगरप्रमुख हरिनारायण चौधरीको कार्यकक्ष अगाडी रातो झोलामा बेरिएर कुनै शंकास्पद वस्तु राखिएको देखिएको छ । स्थानीयले जानकारी गराएपछि प्रहरी एक्सनमा आएको हो । हामीले नेपाली सेनासँग मदत मागेका छौं र अहिले बम डिस्पोजल टोली घटनास्थल पुगेको छ । बम हो की होईन भनेर केही बेरमा मात्र भन्न सकिन्छ ।"- उनले भने ।

जिल्ला प्रहरी कार्यालय सिरहाले उक्त स्थानलाई नियन्त्रणमा लिएको छ भने आसपासबाट सर्वसाधारणलाई खाली गराएको हो ।