सिरहाबाट डिजेल बोकेको ट्यांकर नै लुटियो !

न्यूज ब्यूरो, सिरहा । सिरहाको लहानबाट डिजेल बोकेको ट्यांकर सम्पर्क विहिन भएको छ ।

सोमबार अमलेखगंजबाट विराटनगर गइरहेको डिजेल बोकेको ना ४ ख ४१६३ नम्बरको ट्यांकर सम्पर्क विहिन भएको हो । ट्यांकरलाई एक अज्ञात समूहले अपरहण गरेका हुन् ।

अपहरणकारीहरुले चालक रामदेव यादव र सहचालक उमेश यादवलाई छाडेर ट्यांकरसँगै लगेको जनाइएको छ । उक्त ट्यांकर राति लहान पुगेको र विश्राम गर्नका लागि राजमार्गको हुलाक अफिस अगाडि पार्किङ गरिएकै स्थानबाट अज्ञात समूहले लगेका हुन् ।

जानकारी अनुसार, चालक र सहचालकहरुलाई ६ देखि ८ जनाको समूहमा आएका अज्ञात व्यक्तिहरुले आँखामा पट्टी बाँधेर बर्दिवास र लालबन्दीको बीचमा पर्ने जंगलमा र्पुयाएर छाडेको र ट्यांकर भने उनीहरुले आफैँसँग लगेका छन् । अपहरित उक्त ट्यांकरमा २० हजार लिटर डिजेल थियो ।

बेपत्ता भएको ट्यांकरको खोजविन प्रहरीले जारी राखेपनि हालसम्म फेला पार्न सकेको छैन । यसबारे छानबिन गर्न नेपाल आयल निगमले मंगलबार एक कमिटीसमेत गठन गरेको जनाएको छ ।