'आलम' को समर्थनमा प्रदर्शन, आज आदेशको सम्भावना प्रबल  !

न्यूज ब्यूरो, रौतहट । देशको जल्दोबल्दो पुरानो घटना जिउँदा मान्छेहरुलाई इटा भट्टामा हालेर हत्या गरेको आरोप लागेका निलम्बित कांग्रेस सांसद मोहम्मद अफताव आलमविरुद्धको थुनछेक बहस शुक्रबार जारी छ।

जिल्ला अदालत रौतहटमा वादी र प्रतिवादीका तर्फबाट बहस सकिएपछि आलमलाई पूर्पक्षका लागि थुनामा राख्ने, धरौटीमा छाड्ने अथवा साधारण तारेखमा रिहा गर्ने मध्ये एक आदेश हुनेछ । थुनछेक बहसपछिको आदेश आजै आउने सम्भावना प्रबल छ । सोमबारबाट प्रतिवादी आलमका वकिलहरुले बहस सुरू गरेका थिए।

आलमविरुद्ध कर्तव्य ज्यान, ज्यानमार्ने उद्योग र विस्फोटन भण्डारणको आरोपमा मुद्दा चलेको छ। अदालतमा आलम पक्षका अधिवक्ताहरूले बहस गरि रहँदा उनका समर्थकहरूले सदरमुकाम गौरमा प्रदर्शन गरिरहेका छन्। आलमका समर्थकहरुले सदरमुकाम गौरको बिपी चौकवाट निकालेको जुलुसको अघिपछि व्यापक सुरक्षाकर्मी परिचालन गरिएको छ । अदालतको चार सय मिटर दायाँबाया ठूलो मात्रामा सुरक्षाकर्मीसमेत परिचालन गरिएको छ ।

अहिलेसम्म कानुन व्यवसायी अधिवक्ता सुनिल पोखरेलले बहस गरेका छन्। उनले आलमको पक्षमा वकालत गर्दै उनको बचाउ गरेका छन्। त्यस्तै कानुन व्यवसायी कृष्ण घिमिरे र योगेन्द्र बहादुर अधिकारीको पनि बहस सकिएको छ । आलमको तर्फबाट वरिष्ठ अधिवक्ता रमण श्रेष्ठ, शेर बहादुर केसी लगायत ३४ जनाभन्दा बढी कानुन व्यावसायी बहस गर्ने भएकोले आज पनि थुनछेक बहस नसकिने अनुमान पनि गरिएको छ ।