डा. सिके राउतको जनमत पार्टी उपनिर्वाचनमा सहभागी हुने

न्यूज ब्यूरो, जनकपुरधाम । डा. सिके राउत नेतृत्वको जनमत पार्टी पनि आसन्न उपनिर्वाचनमा सहभागी हुने भएको छ ।

नेपाल सरकारसँग सहमति गरेर मूलधारको राजनीतिमा आएका डा. राउतको जनमत पार्टीले पहिलो पटक निर्वाचनमा सहभागीता जनाउन लागेको हो । मंसिर १४ गते हुन लागेको उपनिर्वाचनमा उम्मेदवारी दिने निर्णय भएको जनमत पार्टीका केन्द्रीय सदस्य अब्दुल खानले जानकारी दिए ।

उपनिर्वाचनमा स्थानीय तहमा मात्र उम्मेदवारी दिने निर्णय गरेको जनमत पार्टीले संघ र प्रदेशसभाका लागि यसपटक उम्मेदवारी दिने छैन । पार्टीको चुनावमा जाने तयारी नभएकाले हुन लागेको उपनिर्वाचनमा स्थानीय तहमा मात्र उम्मेदवारी दिने जनाइएको छ ।

झापादेखि कञ्चनपुरसम्म रिक्त स्थानीय तहमा उम्मेदवारको नाम सिफारिस गर्ने जनमत पार्टीले जनाएको छ ।