जुवाडेमाथि प्रहरीको नजर : सिरहाबाट पनि ८ फन्दामा

न्यूज ब्यूरो, सिरहा । सिरहामा आठ जुवाडे प्रहरीको फन्दामा परेका छन् । सिरहाको सिरहा नगरपालिका–१५ स्थित माडरबाट प्रहरीले आठ जुवाडेलाई पक्राउ गरेको हो ।

प्रहरीले उनीहरुलाई सोमबार राति नै पक्राउ गरेपनि आज (मंगलबार) सार्वजनिक गरेको छ । पक्राउ पर्नेमा सिरहा नपा १४ का २६ वर्षीय नुर खान, ३८ वर्षीय मोहमद रफिक, २५ वर्षीय जावेद खान, सिरहा १५ निवासी ४७ वर्षीय श्याम कुमार यादव, २९ वर्षीय रंजित यादव, २८ वर्षीय दिनेश यादव, ३५ वर्षीय संजिव कुमार महतो र सिरहा गोलबजार नपा ८ का ३३ वर्षीय सिकेन्द्र साफी रहेका छन् ।

जुवातास खेलिरहेको गोप्य सूचनाको आधारमा जिल्ला प्रहरी कार्यालय सिरहाबाट खटेको टोलीले उनीहरुलाई सोमबार १० बजेतिर पक्राउ गरेको सिरहा प्रहरीले जनाएको छ । उनीहरुको साथबाट ७३ हजार ६ सय ५ नेपाली रुपैयाँसहित १२ सय भारतीय रकमसमेत बरामद गरिएको जिल्ला प्रहरी कार्यालय सिरहाका प्रवक्ता तथा डिएसपी अपिलराज बोहराले जानकारी दिए ।

पक्राउ परेका आठै जनामाथि थप अनुसन्धान भइरहेको प्रहरी प्रवक्ता बोहराले जनाए । पछिल्लो पटक प्रहरीले जुवाडेमाथि निगरानी बढाएको छ ।