महोत्तरीबाट २० लाख रुपैयाँसहित दुईजना फन्दामा

न्यूज ब्यूरो, महोत्तरी । महोत्तरीबाट २० लाख रुपैयाँसहित प्रहरीले दुईजनालाई पक्राउ गरेको छ ।

चेकचाँच गर्ने क्रममा दुई छुट्टाछुट्टै ठाउँबाट २० लाख २० हजार नेपाली रुपैयाँसहित दुई जनालाई पक्राउ गरिएको हो । शुक्रबार साँझ जलेश्वर नगरपालिका ३ को भिटठामोडको नेपाल भारत सीमा नजिकैबाट ५ लाख ७५ हजार भारतीय रुपैयाँसहित एक जनालाई पक्राउ प्रहरीले जनाएको छ ।

पक्राउ पर्नेमा धनुषा जिल्ला जनकपुर उपमहानगरपालिका ८ का ३२ वर्षीय विजय महासेठ रहेको प्रहरी नायब उपरीक्षक (डीएसपी) माधवप्रसाद बुढाथोकीले जानकारी दिए । यस्तै, मटिहानी नगरपालिका २ मा जाँच गर्ने क्रममा एक जनालाई ११ लाख नेपाली रुपैयाँसहित प्रहरीले नियन्त्रणमा लिएको छ ।

मटिहानी नगरपालिका ६ का जीवनकुमार पूर्वेको कानुन बमोजिम शरीरमा खानतलासी गर्दा रकम बरामद भएको जिल्ला प्रहरी कार्यालय महोत्तरीले जनाएको छ । पक्राउ परेको दुबै जनालाई आवश्यक कानुनी कारवाहीको लागि जिल्ला प्रहरी कार्यालय महोत्तरीमा राखिएको छ । उनीहरुमाथि थप अनुसन्धान भइरहेको प्रहरीले जनाएको छ ।