जनकपुर : २ बालिका उपर बलात्कार आरोपमा स्कुलकै शिक्षक पक्राउ !

न्यूज ब्यूरो, जनकपुरधाम । धनुषामा दुईजना बालिक उपर पटकपटक जवर्जस्ती करणी गरेको आरोपमा एक शिक्षक पक्राउ परेका छन् ।

धनुषाको मिथिला नगरपालिकास्थित ढल्केबरको एक निजी विद्यालयमा पढ्ने २ जना बालिकामाथि एउटै शिक्षकले पटकपटक यौन शोषण गरेको घटना बाहिरिएको हो । ढल्केबरको ढल्केबर एकेडमी बोर्डिङ्घ स्कुलमा मिनी बोडर्समा पढ्ने एक ७ वर्षीया र अर्की ९ वर्षीया बालिकामाथि ४३ वर्षका शिक्षक टेकेन्द्र दाहालले पटकपटक जवरजस्ती करणी गरेको आरोप लागेको हो ।

घटना बाहिरिएलगत्तै शिक्षक टेकेन्द्रलाई प्रहरीले पक्राउ गरेको छ । झापाको मेचीनगर नगरपालिका ३ घर भएका शिक्षक दाहाललाई २८ गते पक्राउ गरिएको ईलाका प्रहरी कार्यालय ढल्केबरका प्रहरी निरीक्षक रामकुमार यादवले जानकारी दिए ।

दाहालले ती दुई बालिकालाई ललाईफकाई तथा धाकधम्की दिँदै पटकपटक जवरजस्ती करणी गर्दै आएको आरोप लागेको छ । पक्राउ परेका दाहाल उपर जवरजस्ती करणीको मुद्दा दायर गरी थप अनुसन्धान भइरहेको प्रहरीले जनाएको छ ।