बम विस्फोट घटनामा पूर्वमन्त्री आलम पक्राउ, गौरको सुरक्षा व्यवस्था कडा !

न्यूज ब्यूरो, रौतहट । बम विस्फोटके घटनामा संलग्न आरोपमा रौतहटको एक पूर्व मन्त्रीलाई प्रहरीले आज पक्राउ गरेको छ ।

नेपाल सरकारका पूर्व मन्त्री एवम् रौतहट निर्वाचन क्षेत्र नं. २ का साँसद अफताब आलमलाई पक्राउ गरिएको हो । गत वि.सं. २०६४ सालमा भएको एक बम विस्फोटको घटनामा सँलग्नता रहेको आरोपमा उनलाई आईतबार (आज) रौतहट प्रहरीले पक्राउ गरेको हो । रौतहटको राजपुर नगरपालिका वडा नं. ४ स्थित शेख ईद्रीसको घरमा गत वि. सं. २०६४ साल फागुन २७ गते राती बम विस्फोट भएको घटनामा पक्राउ गरिएको हो ।

पूर्व श्रम तथा यातायात मन्त्री एवम् वनराज्य मन्त्री समेत रहेका आलमलाई राजपुर नगरपालिकाको फतुवाबाट आज विहान ११ बजे पक्राउ गरिएको जिल्ला प्रहरी कार्यालय रौतहटले जनाएको छ । उनीमाथि पहिलो संविधानसभाको निर्वाचनमा बुथ क्याप्चर गर्ने उद्देश्यले आफ्नै घरमा बम बनाउन लाग्दा विस्फोट भई घाइते भएकामध्ये १३ जनालाई नजिकैको इँटाभट्टामा जलाएर मारेको आरोप थियो । उनीमाथि प्रहरी पुग्दा सम्पूर्ण प्रमाण नष्ट गरेको आरोप थियो । मारिनेमा भारतीय र नेपाली नागरिक भएको बताइएको छ ।

रौतहटको राजपुर–४ खरहवामा भएको सो विस्फोटनमा घाइते भएपछि जलाइएका दुईजना नेपाली युवाहरु त्रिलोकप्रताप सिंहका बाबु र कौशी अख्तर मियाकी आमाले आलममाथि कार्वाहीको माग गर्दै जिल्ला प्रहरी कार्यालयमा निवेदन दिएका थिए । तर, प्रहरीले आलमबिरुद्ध जाहेरी लिन नमानेपछि मृतकका अविभावकहरुले दोषीमाथिको जाहेरी निवेदन लिनुपर्ने माग गर्दै सर्वोच्च अदालतमा रिट दिएका थिए ।

नेपाली काँग्रेसका पूर्व जिल्ला सभापति समेत रहेका आलमको उपर परेको रिटमाथि सुनुवाई गर्दै तत्कालीन न्यायाधीशद्वय सुशीला कार्की र भरतबहादुर कार्कीको संयुक्त इजलासले १६ जेठ २०६९ मा दोषी आरोपित आलमसहित ५ जनालाई गिरफ्तार गरी कारवाही प्रक्रिया अघि बढाउन आदेश दिएको थियो ।

आलम पक्राउ परे लगत्तै उनका समर्थकहरु जिल्ला प्रहरी कार्यालय रौतहटको अगाडी जम्मा हुन थालेपछि सुरक्षा व्यवस्था हेतु मोटो सँख्यामा प्रहरी परिचालन गरिएको हो । सम्भावित घटनालाई मध्यनजर गर्दैै प्रहरी परिचालन गरी गौरको सुरक्षा अवस्था कडा पारिएको जनाइएको छ ।