जनकपुर : फ्रिजमा करेन्ट लागेर ३ जना ठहरै, राजमार्ग अवरुद्ध !

न्यूज ब्यूरो, जनकपुरधाम । एकै परिवारका दुई जना सहित होटलमा काम गर्ने एक जना महिला गरी करेन्ट लागेर तीन जनाको घटनास्थलमै मृत्यूभएको छ ।

धनुषाको गणेशमान चारनाथ नगरपालिका वडा नं. ७ पोर्ताहामा एकै परिवारका श्रीमान श्रीमति र एक होटलमा काम गर्ने महिला सहित तीन जनाको एकैपटक होटलमा राखिएको फ्रिजमा प्रवाहित करेन्ट लागेर मृत्यू भएको ईलाका प्रहरी कार्यालय ढल्केवरले जनाएको छ । पार्ताहामै स्थानीय बर्ष ५५ का शिवकुमार महतोले सँचालन गर्दै आएको पूर्वेली स्टाफलाइन होटलमा राखिएको फ्रिजमा छोएपछि तीन जनाको मृत्यू भएको जनाइएको छ ।

गएराती (मँगलबारराती) करिब ११ बजेको समयमा होटलमा राखिएको फ्रिज नजिकै तीनै जना आज विहान (बुधबार) मृत अवस्थामा देखिएपछि प्रहरीलाई खवर गरिएको थियो । खवर पाएलगत्तै ईलाका प्रहरी कार्यालय ढल्केवर र जिल्ला प्रहरी कार्यालय धनुषाबाट गएको प्रहरी टोलीले घटनाको मुचुल्का उठाएका हुन् । मृत्यू हुनेमा होटल सँचालक शिवकुमार महतो, उनकी श्रीमति र होटलमै काम गर्ने एक महिला कामदार रहेको जनाइएको छ ।

विहानै होटल सँचालक महतोका आमा होटल गइ ढोका खोल्दा तीनै जनालाई मृत अवस्थामा देखेपछि स्थानीयहरुलाई गुहारेकी थिइन, घटना पश्चातका स्थानीय प्रत्यक्षदर्शीका अनुसार तीनै जना होटलमा राखिएको फ्रिज नजिकै मृत अवस्थामा भेटिएपछि तत्कालै प्रहरीलाई खवर गरिएको थियो । स्थानीयहरुले केहीबेर पूर्वपश्चिम राजमार्गमा चक्काजाम समेत गरेको थियो । ढल्केवर प्रहरीले उक्त जाम २० मिनेटपछि खुलाएपनि पुनः स्थानीयहरुले चक्काजाम गरेका छन् ।

चक्काजामका कारण पूर्वबाट पश्चिम तथा पश्चिमबाट पूर्व तर्फ जाने सवारी साधनहरु यथास्थानमै जकथक परेका छन् । जिल्ला प्रहरी कार्यालय धनुषाका प्रहरी प्रवक्ता डिएसपी रामेश्वर कार्की सहितको टोली समेत घटनास्थल पुगेको जनाइएको छ । यता, तीनै जनाको शवलाई पोष्टमार्टमको लागि जनकपुर अञ्चल अस्पताल ल्याउने तयारी भईरहेको जनाइएको छ ।