आज सिँगो मधेश 'बल्याकआउट', जहाँ मधेशी त्यहाँ प्रदर्शन !

न्यूज ब्यूरो, जनकपुरधाम । मधेश तथा देशैभर विभिन्न स्थानमा आज असोज ३ गते संविधानको विरोधमा कालो दिनको रुपमा मनाइएको छ ।

मधेशी, आदिवासी, जनतजाती, दलित, मुस्लिम एवं पिछडिएका वर्गहरुले संविधानले आफूहरुको हक अधिकारको संरक्षण नगरेको र सरकारले आफूहरुको अधिकार ग्यारेन्टी हुने गरी संविधान संशोधन गर्न पनि अस्वीकार गरेको भन्दै देशको अधिकांश ठाउँमा प्रदर्शन गरेका छन् । संविधान जारी भएको आजको दिनलाई ‘असोज तीन, कालो दिन’ भन्दै प्रदर्शन गरिएको हो ।

मधेशलगायत देशको विभिन्न स्थानमा रहेका संविधानप्रति असन्तुष्ट जनताले कालो ब्यानर, कालै फेटा शीरमा बाँधेर प्रदर्शन गरेका हुन् । मुलतः तराई मधेशका जिल्लाहरु धनुषा, सिरहा, महोत्तरी, सर्लाही, सप्तरी, रौतहट, बारा, पर्सा, सुन्सरी लगायतका जिल्लामा मधेशीहरुले ‘असोज तीन, कालो दिन’ भन्दै कालो दिनको रुपमा मनाए ।

मधेश आन्दोलनबाटै उदय भएका नेपाल सरकारका उपप्रधान एवं स्वास्थ्यमन्त्री उपेन्द्र यादवको पार्टीले भने यसपाली विरोधका कार्यक्रम नगरेपनि राजपा नेपालले मधेशको सबै जिल्लामा विरोधका कार्यक्रमहरु गरेका छन् । राजपाले सबै जिल्लामा आफ्ना नेता कार्यकर्तालाई खटाएको थियो । संविधान दिवसको अवसरमा प्रदेश २ को अस्थायी राजधानी जनकपुरमा आयोजित विरोध सभामा राजपा नेपालका नेता महन्थ ठाकुरले संविधान संसोधन नभएसम्म संविधानको विरोधमा कालो दिवस मनाउने चेतावनी दिए ।

उनले नेपालको अन्तरिम संविधानको १३८ (क) मा सम्पूर्ण मधेश एक स्वायत प्रदेश राख्ने सहमति भएपनि सरकारले ८ वटा मधेशको जिल्लालाई मात्र एउटा प्रदेशमा सीमित गरेको आरोप लगाए । उनले बाँकी मधेशको जिल्लाहरुलाई अन्य प्रदेशमा किन जोडियो भन्दै सरकारप्रति प्रश्न तेर्साए । राज्यले थुप्रै आश्वासन दिएपनि त्यसलाई पूरा नगरेको र त्यसको विरोध गर्दा प्रहरीको गोली चलाएर मधेशी जनताको हत्या गरेको आरोप पनि उनले लगाए । अहिले राष्ट्रमा एकल पहिचानको आधारमा राष्ट्रियताको परिभाषित गरिएकाले जबसम्म सम्पूर्ण जाति, समुदाय, धर्मको आधारमा राष्ट्रियता परिभाषित हुँदैन, तबसम्म आन्दोलन जारी रहने उनले बताए ।

संविधान दिवस विरुद्धको कार्यक्रम शान्तिपूर्ण देखिएपनि प्रहरी भने ठूलो संख्यामा परिचालन गरिएको थियो । यता, स्वतन्त्र युवा तथा मधेशवादी दल बाहेककाहरु संविधान जारी भएको दिनलाई विशेष रुपले मनाएको छ ।