नेपालको संविधानको विरुद्धमा मधेशमा आज 'कालो दिन' मनाइँदै

न्यूज ब्यूरो, जनकपुरधाम । आज असोज ३ गते संविधान दिवसको दिन मधेशमा संविधानविरुद्धको कालो दिवस मनाइँदैछ ।

संविधान जारी भएको दिन (असोज ३) गतेलाई नेपाल सरकारले संविधान दिवसको रुपमा मनाइरहेका बेला मधेश केन्द्रीत दल तथा मधेशी युवाहरुले यस दिनलाई कालो दिवसको रुपमा मनाउँदैछन् । मधेशको विभिन्न स्थानमा कालो दिन मनाउन विरोधसभाको आयोजना गरिएको छ भने साँझमा ब्ल्याक आउट गर्ने तयारी छ ।

लामो सयम मधेश आन्दोलन चल्दा पनि हालसम्म संविधान शंसोधन अथवा पुनःलेखन मार्फत् तराई मधेशको सम्पूर्ण माग संविधानमा नसमेटिएको भन्दै यसवर्ष पनि संविधानको वार्षिकोत्सवमा मधेशी, आदिवासी, जनतजाती, दलित, मुस्लिम एवं पिछडिएका वर्गहरुले कालो दिन मनाइरहेका छन् ।

विभिन्न संघर्षले राजतन्त्रको अन्त्यसंगै आएको लोकतन्त्र र गणन्त्र स्थापना पश्चात् भएको दोश्रो संविधानसभाबाट गएको २०७२ असोज ३ गते अजकै दिन नेपालको संविधान २०७२ घोषणा भएको थियो । त्यसबेला संविधानमा मधेशी, आदिवासी, जनतजाती, दलित, मुस्लिम एवं पिछडिएका वर्गहरुको अधिकार कटौती एवं सीमांकनको विवादको लागि तराई मधेश आन्दोलन जारी थियो ।

तराई मधेशमा मधेशी जनता आफ्ना बाँकी अधिकार संविधानमा समेटेर शान्तिपूर्ण आन्दोलन गरिहेको बेला राज्यपक्षबाट दर्जनौ मधेशी जनताहरुको हत्या भएको थियो ।

व्यापक विरोधका बीच असोज ३ गते मधेशबादी दलबाहेक अन्य प्रमुख तीन दल लगायतले बहुतले संविधान घोषाणा गरेको थियो । त्यसदिन हिमाल पहाड र तराइ मधेशका जनता किता कितामा विभाजित भएर कतै दीप प्रज्वलन गरी उत्सव मनाएका थिए भने कतै वती निभाएर ब्ल्याक आउट गरी शोक मनाएका थिए ।

लामो सयम मधेश आन्दोलन चल्दा पनि हालसम्म संविधान शंसोधन अथवा पुनरलेखन मार्फत तराई मधेशको सम्पूर्ण माग संविधानमा नसमेटिएको भन्दै यसवर्ष पनि संविधान दिवसको दिनमा दुई कितामा विभाजित भएर कतै उत्सव र कतै शोक मनाइरहेका छन् । मधेश केन्द्रीत दल राष्ट्रिय जनता पार्टी नेपालले संविधान दिवसको अवसरमा विरोध दिवसको घोषणा गरिसकेका छन् ।

मधेश आन्दोलनबाट उदय भएका नेपाल सरकारका उपप्रधान एवं स्वास्थ्यमन्त्री उपेन्द्र यादवको पार्टीले भने यसपाली विरोध दिवस नमनाउने भएका छन् । उनको समाजवादी पार्टीले कालो दिन पनि नमनाउने र संविधान दिवसको कार्यक्रममा पनि नजाने निर्णय गरेको छ । पार्टीको यो निर्णय सार्वजनिक भएलगत्तै मधेशमा यस उपर विभिन्न खालका टिप्पनी भइरहेका छन् । उपेन्द्र यादवले सत्ताको लोभमा जनतालाई गुमराहमा पारेको र मधेशसँग ‘डबल गेम’ खेलिरहेको जस्ता टिप्पनीहरु भइरहेको देखिएको छ ।

समाजिक सञ्जालहरु फेसबुक, ट्वीटरमा पनि यसमा दुई किता देखिएको छ । तराई मधेशका अधिकांश जनताले आफ्नो प्रोफाइल फोटोमा कालो फोटो राखेर संविधानको विरोध गर्दै कालो दिन मनाइरहेका छन् । तराई मधेशका जिल्लाहरु धनुषा, सिरहा, महोत्तरी, सर्लाही, सप्तरी, रौतहट, बारा, पर्सा, सुन्सरी लगायतका जिल्लामा मधेशीहरुले ‘असोज तीन, कालो दिन’ भन्दै कालो दिनको रुपमा मनाउँदैछन् ।