मधेशको मौसममा सुधार : बल्ल लाग्यो घाम !

न्यूज ब्यूरो, जनकपुरधाम । तराई मधेशमा केहिदिन यताको वर्षाले विराम लिएपछि घाम लागेको छ ।

निरन्तरको पाँच दिनदेखिको मौसम बदली भएर घाम लागेपछि जनजीवन सामान्य बनेको छ । गत आइतबारदेखिको लगातारको वर्षाले वाक्कदिक्क बनाएका बेला आज बिहीबार एकाबिहानै झलमल्ल घाम देखिएपछि सर्वसाधारण राहत पाएका छन् ।

आइतबारदेखि लगातार परेको पानीले धानबालीलाइ निकै राहत दिएको छ । यद्यपी नयाँ लगाइएका तरकारीका बेर्ना र अन्य फलफूलका बिरुवाभने चोटिलो पानीमा परेर लतारिएका छन् । धेरैजसो भर्खरै रोपिएको कोवीका बिरुवालाई चोटिलो बर्षाले सुताएर माटोमा मिलाउँदा नोक्सानी पनि भएको देखिएको छ ।

जिल्लाका पशुपालक किसानले घाम झुल्कदा राहत महसुस गरेका छन् । लगातारको बर्षाले गोठमै रहेका पशुबस्तु चरनको समस्या हल भएको छ । पछिल्लो बर्षाले नगर÷गाउँ बस्तीका सडक हिलाम्य बनाएको छ ।

राष्ट्रिय महत्वका दशैं, तिहार र छठजस्ता चाडवाड मुखमा आएका बेला पछिल्लो चार दिनको बर्षाले सडक भत्काएर खाल्डाखुल्डी बढाएको छ । हिलाम्य सडकको पानी निकास, भत्काएका सडकको मर्मत र खाल्डाखुल्डी पुर्न नसकिए चाडपर्वको मुखमा आवतजावतमा समस्या हुने सर्वसाधारणको चिन्ता पनि छ ।