रौतहटमा दाइजोको निहुँमा श्रीमानद्धारा श्रीमतीको हत्या

न्यूज ब्यूरो, रौतहट । रौतहटमा दाइजो नदिएको भन्दै एकजनाले आफ्नै श्रीमतीको हत्या गरेका छन् ।

रौतहटको राजपुर नगरपालिका ७ अकोलवाका रामबाबु सहनीले २५ वर्षीया श्रीमती सन्जु देवीको बिहीबार हत्या गरेका हुन् । दाइजोमा मोटरसाइकल नदिएको निहुँमा सन्जुको हत्या गरिएको हो ।मृतक सन्जुका बुवा अविलास सहनीले प्रहरीमा दिएको किटानी जाहेरीका अनुसार ज्वाइँ रामबाबु दाइजोमा मोटरसाइकल नदिएको कारण कुटपीट गरी हत्या गरेका छन् । केही महिनाअघि कान्छी छोरीको बिहे गर्दा मोटरसाइकल दाइजो दिएको देखेपछि रामबाबुले सन्जुमार्फत् आफूलाई पनि मोटरसाइकल चाहियो भनेर माग्ने गरेको र नदिएपछि बिहीबार दिउँसो सन्जु हत्या गरेका बताए ।

छोरीको मृत्यु भएको खबर पाएपछि त्यहाँ गएर हेर्दा छोरीको घाँटीमा डाम देखिएकाले ज्वाइँले नै छोरीको हत्या गरेको बुबाको भनाई छ । ज्वाइँ रामबाबुले पहिलादेखि नै दाइजोमा मोटरसाइकल माग गर्दै सञ्जुलाई मानसिक याताना तथा कुटपीट गर्दै आएको बुबा अविलासले बताए ।

यता, जिल्ला प्रहरी कार्यालय रौतहटले उनको श्रीमान रामबाबु र ससुरा मोहन सहनीलाई पक्राउ गरेर अनुसन्धान अघि बढाएको छ ।