महोत्तरीमा लाखौंको चोरी, एक घाईते

न्यूज ब्यूरो, जलेश्वर । गएराती महोत्तरीमा लाखौंको धनमाल चोरी भएको प्रहरीले जनाएको छ ।

जिल्लाको मनरा सिसवा नगरपालिका वडा नं. ३ सुनौल टोलमा गएराती लाखौंको धनमाल चोरी गरी भागेको जिल्ला प्रहरी कार्यालय महोत्तरीले जनाएको छ । प्रहरीका अनुसार केही टयाप्पेहरुले दुई घरमा चोरी गरी भागेको छ । स्थानीय रामलोचन राउतको घरमा चोरी गर्न गएका उनीहरुलाई राउत परिवारले प्रतिकार गरेका थिए । त्यसपछि आफ्नो बचाउमा चोरहरुले समेत राउत उपर प्रहार गरी घाईते बनाएको प्रहरीले जनाएको छ । प्रहरीका अनुसार पीडित राउतको खुट्टामा चोट लागेको छ र उनको अवस्था समान्य छ ।

त्यही समूहको अन्य जनाले राउतकै छिमेकी रहेको सियारामशरण राउतको घरमा चोरी गरेको प्रहरीले जनाएको छ । चोरी गरिरहेको खवर पाएलगत्तै स्थानीयहरु जागेपछि उनीहरु भागेको जिल्ला प्रहरी कार्यालय महोत्तरीका प्रहरी उपरीक्षक (एसपी) श्याम कृष्ण अधिकारीले जानकारी दिए । परिवारजनलाई उदृत गर्दै उपरीक्षक अधिकारीले १ लाख बढी नगद २ तोला सुन र ५० तोला चाँदीका गरगहनाहरु चोरी भएको जनाए ।

यता, पीडित परिवारजनहरुले भने घरमा डकैती भएको दाबी गर्दै कुल ६ तोला सुन ६० तोला भन्दा बढी चाँदी र २ लाख भन्दा बढी रकम डकैती गरेर लगेको बताएका छन् । उनीहरुले डाँकाहरुले राम लोचन राउतको खुट्टामा बन्चरो प्रहार गरेको दाबी गरेपनि एसपी अधिकारीले भने डकैती नभएर चोरी मात्र भएको दाबी गरेका छन् । अधिकारीका अनुसार, चोरी गर्नेहरुमा टयाप्पे केटाहरु रहेका छन् र उनीहरुको हल्का पहिचान खुलीसकेको जनाउँदै शिघ्र नै प्रहरी गिरफ्तमा आउने दाबी गरे ।