पत्नी भाग्न सहयोग गरेको भन्दै बच्चा अपहरण : प्रहरीद्धारा बालकको सकुशल उद्धार

न्यूज ब्यूरो, सिरहा । सिरहामा अपहरणमा परेका एक बालकलाई प्रहरीले सकुशल उद्धार गरेको छ ।

सिरहाको कर्जन्हा २ बन्दिपुरबाट अपहरित बालकलाई प्रहरीले भारतीय सीमावर्ती क्षेत्रबाट सकुशल उद्धार गरेको हो ।

श्रीमतीलाई भाग्न सहयोग गरेको निहुँमा छिमेकी भारतको विहार राज्यका सितामढी घर भएका शोभित मुखियाले सिरहाको बन्दीपुरबाट भदौ १० गते अपहरण गरेको ५ वर्षीय बालक शिवम यादवलाई ३ दिनपछि प्रहरीले उद्धार गरी परिवारलाई जिम्मा लगाएको छ ।

मुखियाले आफ्नी पत्नीलाई भगाउन सहयोग गरेको आरोप लगाउँदै भारतीय नागरिक मुखियाले बन्दिपुर बस्दै आएका बच्चा यादवको ५ वर्षीय छोरा शिवमलाई गत मङ्गलबार अपहरण गरेका थिए । मुखियाले पत्नी सुरेखालाई भगाउन बालकका बुबाआमाले सहयोग गरेको आरोप लगाउँदै शिवमलाई अपहरण गरेका थिए ।

चटपटे व्यवसाय गर्ने मुखिया बाहिर गएको बेला भदौ २ गते उनकी पत्नी सुरेखा मुखिया भागेपछि शोभितले आफ्नो पत्नी भगाउन बच्चा यादव र उनकी पत्नी सुखनीदेवी यादवले सहयोग गरेको आरोप भन्दै पटकपटक झगडा हुँदै आएको थियो । आफूहरुको संलग्नता नरहेको बताउँदै आएका यादव दम्पतीलाई पत्नी फर्काउन दबाब दिन शोभितले शिवमको अपहरण गरेको प्रहरीको अनुसन्धानबाट खुलेको छ ।

जिल्ला प्रहरी कार्यालय सिरहाले पत्रकार सम्मेलन गरी बालकसहित पक्राउ परेका अपहरणकारी मुखियालाई सार्वजनिक गर्दै घटनाबारे जानकारी गराएको हो । बन्दीपुरबाट धनुषाको पोर्ताहा, पोर्ताहाबाट महोत्तरीको बर्दिबास, त्यहाँबाट बन्दीपुरकै रामगोपालपुर, भित्तामोड हुँदै भारतको सीतामढी र त्यहाँबाट सर्लाहीको विष्णु गाउँपालिका–५ स्थित नेपाल भारतको सीमामा पुगेका मुखियालाई प्रहरीले बालकसँगै फन्दामा पारेका हुन् ।

घट्नामा संलग्न अपहरणकारीलाई जिल्ला अदालत सिरहाबाट म्याद थप गरी घट्ना बारे थप अनुसन्धान भइरहेको सिरहाका प्रहरी उपरीक्षक (एसपी) उमाप्रसाद चतुर्वेदीले जानकारी दिए ।