धनुषाको शहिदनगरमा शिक्षा ऐन लागू, नगरको सबै विद्यालयमा दरबन्दी मिलान

न्यूज ब्यूरो, जनकपुरधाम । धनुषाको शहिदनगरमा स्थानीय तह सँचालन ऐन २०७४ लागू गर्दै शिक्षा तर्फ दरबन्दी मिलान गरिएको छ ।

नगर प्रमुख उदय कुमार बरबरिया (यादव) ले दिएको जानकारी अनुसार स्थानीय तह सँचालन ऐन २०७४ ले स्थानीय तहलाई शिक्षा सँचालनका लागि तोकेको विभिन्न २३ वटा अधिकार र कार्यक्षेत्र अन्तर्गतको दरबन्दी मिलान बुंदालाई लागू गरिएको छ ।

नगरभित्र रहेको प्रावि, निमावि र मावि स्तरका समुदायिक विद्यालयहरुमा शिक्षक शिक्षिका तथा कर्मचारीहरुको दरबन्दी मिलान गरिएको जनाइएको छ । नगरपालिका भित्र रहेको ३ वटा मावि, ५ वटा निमावी र २६ वटा प्रावि गरी जम्मा ३४ वटा समुदायिक विद्यालय सँचालन रहेकोमा सबैमा दरबन्दी मिलान गरिएको हो ।

मावि विद्यालय तर्फ २१ जना, निमावि तर्फ १४ जना, प्रावि तर्फ ९२ जना र बाल विकास तर्फ ५८ जना गरी जम्मा १ सय ८५ शिक्षक कार्यरत रहने गरी दरबन्दी मिलान गरिएको हो । ३४ वटै विद्यालय मध्ये ७ वटा विद्यालयमा बाल विकास तथा राहत शिक्षकको भरमा सँचालन हुँदै आईरहेकोमा उक्त विद्यालयरुमा कम्तिमा पनि १ जना स्थायी शिक्षक हुने गरी दरबन्दी मिलान गरिएको जनाइएको छ ।

शिक्षा विकास तथा समन्वय इकाइको गत वि.सं. २०७५ फागुन १७ गतेको निर्णय अनुसार तथा स्थानीय सरकार सँचालन ऐन २०७४ ले स्थानीय तहलाई शिक्षा सँचालनका लागि विभिन्न २३ वटा अधिकार तथा कार्यक्षेत्र तोके बमोजिम दरबन्दी मिलान गरिएको हो

शिक्षाको गुणस्तरियता बढाउनको लागि नगरभित्रको विद्यालयहरुमा दरबन्दी मिलानको आवश्यकतालाई मध्यनजर गर्दै मेयर उदय कुमार बरबरियाले दरबन्दी मिलान कार्यलाई मूर्तरुप दिन सफल भएका छन् । शहिदनगर नगरपालिकाको शिक्षा समितिको गत साउन २२ गतेको निर्णय अनुसार दरबन्दी मिलान गरिएको जनाइएको छ ।

मेयर बरबरियाका अनुसार, बाल विकास शिक्षिकाको भरमा विद्यालय चलेको, राहत शिक्षकको भरमा विद्यालय चलेको, धेरै जसो विद्यालयमा शिक्षक विद्यार्थी अनुपात नमिलेको तथा विषयगत शिक्षक नमिलेको कारणले दरबन्दी मिलान एक मात्र विकल्प अपनाएको दाबी गरे ।