श्रीकृष्णले दिएको उपदेशलाई आत्मसाथ गरौं : प्रदेश प्रमुख कायस्थ

न्यूज ब्यूरो, जनकपुरधाम । प्रदेश नं. २ का प्रदेश प्रमुख रत्नेश्वरलाल कायस्थले भगवान श्रीकृष्णले दिएको उपदेशलाई अनुशरण गर्दै सत्कर्ममा लाग्नुपर्ने बताएका छन् ।

श्री कृष्णाष्टमी पर्वको अवसरमा ब्रहमाकुमारी राजयोग सेवा केन्द्र जनकपुरले आयोजना गरेको कार्यक्रमलाई सम्बोधन गर्दै प्रदेश प्रमुख कायस्थले भगवान समय समयमा मानवको विभिन्न रुप धारण गरी धर्तीमा प्रकट हुने गरेको र मानव जातिलाई सत्कर्ममा हिड्न प्रेरित गर्दै आईरहेको बताएका हुन् ।

उनले मानव जातिलाई फलको चिन्ता नगरी कर्म गर्दै गए समाज तथा राष्ट्रको कल्याण हुने धारणा समेत राखे । भगवान श्री कृष्णको जस्तै असत्यलाई त्यागेर सत्यको मार्गमा हिँडे समस्त मानव जातिको कल्याण हुने समेत बताए ।

जबसम्म धर्तीमा अन्याय अत्याचार र पाप भईरहन्छ तबसम्म कुनै न कुनै रुपमा भगवानको धर्तीमा आगमण भईरहने कुरा हिन्दु ग्रन्थहरुमा उल्लेख रहेको स्मरण समेत गराए ।