डा. सिके राउत स्वदेश फिर्ता : मधेशी कामदारलाई यस्तो संदेश !

न्यूज ब्यूरो, काठमाडौं । जनमत पार्टीका अध्यक्ष डा. सिके राउत कतार भ्रमण सकेर स्वदेश फिर्ता भएका छन् ।

गत साउन २३ गते १० दिने कतार भ्रमणमा गएका डा. राउत आज (आईतबार) काठमाडौं आइपुगेका हुन् । विहान ११ बजे त्रिभुवन अन्तराष्ट्रिय विमानस्थलमा ओर्लेका अध्यक्ष राउतलाई अतिविशिष्ट कक्षमा जनमत पार्टीका केन्द्रीय नेताहरुले स्वागत गरेका छन् ।

देश बाहिर रहेका मधेशीहरुको छाता संगठन गैरआवासीय मधेशी संघ (एनआरएमए) द्धारा आयोजित कार्यक्रममा भाग लिन डा. राउत कतार गएका थिए । भ्रमणका क्रममा उनले विभिन्न क्याम्पहरुको भ्रमण गरी त्यहाँ रहेका नेपाली कामदारहरुको अवस्था तथा समस्या समेत बुझेका छन् ।

डा. राउत रोजगारीको शिलशिलामा कतारमा रहेका नेपाली कामदारहरुको समस्या समाधानका लागि पहल तथा चाहिने समयोग गर्न नेपाली दूतावाससँग छलफलसमेत गरे । मधेशी कामदारहरुसँग मधेशको अवस्थाबारे समेत छलफल गरेका डा. राउतले स्वदेशमै रोजगारी सृजना गर्न आफ्नो पार्टीले कुनै कसर बाँकी नछाड्ने विश्वास दिलाए ।

दुई देशबीच सुमधुर सम्बन्ध स्थापित गर्न तथा आर्थिक, सांस्कृतिक, प्राविधिक सहकार्यका सम्भावनाहरूको बारेमासमेत छलफल गरिएको छ । भ्रमणका क्रममा डा. राउतलाई नेपाली दूतावाससहित अन्य मधेशी संघ संगठनहरुले भव्य स्वागत तथा अभिनन्दन गरेका थिए ।