गाउँगाउँमा सिंहदरबार ल्याउन चाहेका थियौँ, तर नारायणहिटी दरबार आयो : प्रभु साह

न्यूज ब्यूरो, बारा । नेकपा प्रदेश २ का अध्यक्ष तथा संघीय सांसद प्रभु साहले स्थानीय तहहरुमा आएका जनप्रतिनिधिको व्यवहारले राजतन्त्रको झझल्को दिएको भन्दै दुःख पोखेका छन् ।

बिहीवार बाराको आदर्शकोतवाल गाउँपालिकामा आयोजित बारा जिल्ला कमिटी सदस्य शम्भु मण्डलको श्रद्धाञ्जलीसभामा अध्यक्ष साहले जनताको लागि गाउँगाउँमा ल्याइएको सिहंदरबारसँगै नारायणहिटी पनि सँगसँगै आएको झैँ देखिरहेको भन्दै दुःख प्रकट गरेका हुन् ।

नयाँ चुनिएर आएका जनप्रतिनिधिको व्यवहारले सामन्तवादको अवशेष बाँकी रहेको झैँ झल्को दिइरहेको र यो नै परिवर्तन संस्थागत हुन नदिने ठूलो कारक भएको बताए । उनले भने, ‘हामी जनतालाई अझै बलियो बनाउन चाहन्छौँ । गाउँमा सिंहदरबार ल्याउन चाहेका थियौँ तर काहीँ काहीँ नारायणहिटी दरबार आइपुगेको छ जस्तो लाग्छ । जुन चिन्ताको विषय हो । राजा त हटाएका छौँ तर कुनै कुनै ठाउँमा त्यसको अवशेष बाँकी छ । जनप्रतिनिधिहरु राजाझैँ प्रस्तुत हुन थालेका छन्, जुन परिवर्तन संस्थागत गर्न सबैभन्दा ठूलो चुनौति हो ।’

कम्युनिष्ट आन्दोलनमा शम्भु मण्डलको ऐतिहासिक भुमिका रहेको भन्दै अध्यक्ष साहले भने, ‘शम्भु मण्डलको निधनले पार्टी र समाजलाई क्षति भएको छ । उहाँहरु जस्ता वीर वामपन्थीहरुको योगदानबाट सामन्तवादविरुद्धको लडाई सफल भएको छ । तर पनि केही सामन्तवादी संस्कृति र संस्कारको अवशेष अझै पनि समाजमा बाँकी छ । ती अवशेषको बलमा नयाँ नयाँ राजा जन्मिने संभावना रहेको छ । सामन्तवादविरुद्धको लडाईलाई उत्कर्षमा पुर्याउन तथा जुन शम्भु मण्डलजस्ता वीर कम्युनिष्ट योद्धाहरुको सपना पुरा गर्न त्यसमाथि नजर राख्नुपर्छ र ती अवशेषहरु मेटाउनुपर्छ ।’

रौतहट निर्वाचन क्षेत्र नं. ३ बाट प्रतिनिधि सभा सदस्यमा निर्वाचित साहले प्रदेश नम्बर २ सरकार संघीयताका लागि सबैभन्दा ठूलो खतरा रहेको आरोप लगाए । अध्यक्ष साहले भने, ‘प्रदेश नम्बर २ पुरै भ्रष्टाचारमा लिप्त छ । जुन संघीयताका लागि सबैभन्दा घातक हो ।’ उनले थपे, ‘प्रदेश सरकार नै भ्रष्टाचार गर्न थालेपछि संघीयता कसरी सफल हुन्छ ? संघीयतालाई असफल पार्ने र जनतालाई निराश पार्ने काम प्रदेश नम्बर २ सरकारले गरिरहेको छ । जनताले तिरेको करलाई पार्टी र नेताको पैसा बनाउने काम प्रदेश सरकारले गरिरहेको छ ।’

राज्यको पैसा मुख्यमन्त्री, मन्त्री, मेयर तथा नेताको खातामा पुर्याउने काम गरी प्रदेश सरकार संघीयता असफल पार्ने कार्यमा लागेको आरोप लगाएका हुन् । प्रदेश सरकारले जनविरोधी काम गर्ने, जनताको पैसामाथि भ्रष्टाचार गर्ने, व्यक्तिगत स्वार्थ पूरा गर्ने दिशामा लागेका कारण संघीयताका लागि खतराको विषय रहेको जिकिर गरे ।