राजपाको संयोजकमा राजकिशोर यादव चयन

न्यूज ब्यूरो, सिरहा । नेपालको राष्ट्रिय राजनीतिमा प्रभावशाली तथा दिग्गज नेता मानिएका संघीय सांसद एवं राजपा नेता राजकिशोर यादव राष्ट्रिय जनता पार्टी (राजपा) को अध्यक्ष मण्डल संयोजकको जिम्मेवारी पाएका छन् ।

मधेश केन्द्रित दलहरु एकिकृत भएर बनेको राजपा नेपालको एकतामा समेत अहम भूमिका निभाएका नेता यादव राजपाको अध्यक्ष मण्डलको संयोजकको जिम्मेवारी पाएका हुन् ।

अध्यक्ष मण्डलका संयोजक अनिलकुमार झाको अध्यक्षतामा सोमबार जनकपुरधाममा बसेको राजपा अध्यक्ष मण्डलको बैठकले यादवलाई संयोजकको जिम्मेवारी दिने निर्णय गरेको हो । नेता यादव साउन ६ गते भोलि (सोमबार) देखि संयोजकको जिम्मेबारी निर्वाह गर्नेछन् ।

मधेशी दलबाट नेतृत्व गरेका नेता यादव विभिन्न समयमा भएको मधेश आन्दोलनमा ठूलो योगदान दिएका छन् । जनहितको लागि गरेका कार्य तथा मधेश र मधेशीको हकहितमा संसद तताउने नेता मध्ये उनी एक मानिन्छन् ।

सिरहा निर्वाचन क्षेत्र नं. ४ बाट निर्वाचित सांसद यादव राजपाको संयोजक भएपछि बधाईको ओईरो लागेको छ ।

राजपाको अध्यक्ष मण्डलको चक्रीयप्रणाली अन्तर्गत यो सँगै राजपाका ६ जनै अध्यक्षले संयोजकको जिम्मेबारी निर्वाह गर्ने मौका पाएका छन् ।

राजपाको महाधिवेशन आगामी कात्तिकमा हुँदैछ । राजपा नेताहरु पार्टीको महाधिवेशनबाट एकल अध्यक्ष कायम गर्नेमा एकमत भएका छन् ।