धनुषाको शैक्षिक अवस्थामा हदैसम्मको सुधार हुनेछ : शिक्षा प्रमुख रजक

न्यूज ब्यूरो, धनुषा । धनुषामा रहेको ६ वटा नमूना सामुदायिक विद्यालयको अवस्था अत्ति कमजोर बनेको एक अध्ययनले देखाएको छ ।

शिक्षा, विज्ञान तथा प्रविधि मन्त्रालय अन्तर्गतको शैक्षिक गुणस्तर परीक्षण केन्द्रले गरेको अध्ययनमा धनुषाको नमूना घोषित सामुदायिक विद्यालयमा पठन पाठनको गुणस्तर कमजोर रहेको देखाइएको हो ।

धनुषाका शिक्षा विकास तथा समन्वय ईकाई प्रमुख बरखु प्रसाद रजकको अध्यक्षतामा जनकपुरमा भएको कार्यक्रममा शैक्षिक गुणस्तर परीक्षण केन्द्रका निर्देशक नारायण प्रसाद झाले धनुषामा नमूना घोषणा भएका सामुदायिक विद्यालयको अवस्थामा धेरै सुधारको आवश्यकता रहेको आल्याए ।

अध्ययन प्रतिवेदनमा मधेशका विद्यालयहरुको अवस्था दिन प्रतिदिन बिग्रदै गएको उल्लेख रहेको छ । देश भरिका १८ सय सामुदायिक विद्यालयमा गरिएको अध्ययनबाट १ उत्तम, ३ सय ५ मध्यम, १५ सय ६४ सामान्य तथा १७ वटा विद्यालय कमजोर रहेको देखिएको छ ।

अध्ययन प्रतिवेदनमा देशकै विकट जिल्ला मनाङको विद्यालय भन्दापनि प्रदेश २ को सप्तरी, सर्लाही, धनुषा र महोत्तरीका विद्यालयहरुको अवस्था कमजोर रहेको देखाइएको छ ।

कार्यक्रममा धनुषाका शिक्षा विकास तथा समन्वय ईकाई प्रमुख रजकले जिल्लाको शैक्षिक स्तर तथा अवस्था उकास्न प्रयासरत रहेको जनाए । उनले धनुषाको शैक्षिक अवस्थामा हदैसम्मको सुधार ल्याउने लक्ष्य लिएको समेत खुलाए ।