मेयर बरबरियाले जनताको सार्वजनिक गुनासो सुने

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर उदय कुमार बरबरिया (यादव) ले नगरका जनताहरुको सार्वजनिक गुनासो सुनेका छन् ।

नगरको विकास निर्माणको गतिविधि, विकासको अवस्था, जनसेवाग्राहीको समस्या, अपेक्षाहरु एकिकृत रुपमा नगरका जनताहरुलाई भेला पारी समस्या टिपोट गरेका हुन् । समस्या टिपोट गर्दै उनले आगामी आर्थिक वर्षमा ती समस्याहरु उपर छलफल गरी निराकरणको प्रयास गर्ने बताएका थिए ।

शहिदनगर नगरपालिकाको आर्थिक सहयोग तथा जनकपुरको एक रेडियोको आयोजनामा गरिएको कार्यक्रममा नगरका जनताहरुले प्रत्यक्ष रुपमा मेयरको काम कारवाही, नगरपालिकाको कामकारवाही, समस्या, गुनासो तथा सुझाहरु प्रस्तुत गरेका थिए ।

नगरका जनताले नगरपालिकाको कर्मचारी, जनप्रतिनीधि उपर उठाएको प्रश्नको जवाफ सम्बन्धीत सबै व्यक्तिहरुले जनतालाई फर्काएका थिए । सो क्रममा विकास निर्माणको कार्यहरु सहित अन्य क्षेत्र, सुविधा, दुविधा र समस्याहरुको बारेमा खुलेर प्रश्न गरेका थिए भने सम्बन्धित वडाका जनप्रतिनीधि, मेयर, उपमेयर, कर्मचारीहरुले जवाफ दिएका थिए ।

नगरपालिकाका सयौं नागरिक उपस्थित उक्त सार्वजनिक सुनुवाई कार्यक्रममा मेयर उदय बरबरिया यादव, उप मेयर शिला कापर, प्रमुख प्रशासकीय अधिकृत नन्द कुमार झा , वडाध्यक्षहरुमा तेजिलाल यादव, जैसी भिन्बार, नागेन्द्र मण्डल, कन्हैया मुखिया, रामरतन पासवान, रामएकबाल मण्डल, मनोज साह, तनुकलाल कुसियैत यादव, रामदेव मरिकले जनताको प्रश्नको जवाफ दिए ।

यसका साथै सामुदायसंग प्रहरी सुरक्षा कार्यक्रम अन्तर्गत ईलाका प्रहरी कार्यालय यदूकूहाका इंस्पेक्टर भीम बहादुर खड्का लगायतले समेत आम सर्वसाधारणले उठाएको जिज्ञासा र प्रश्नको जवाफ दिएका थिए ।