'सरकारले मधेशी उपर तरवार चलाएर चौथो मधेश आन्दोलन निम्त्याउन खोज्यो'

न्यूज ब्यूरो, जनकपुरधाम । सरकारले मधेशी उपर फेरी तरवार चलाउन खोजेको भन्दै चौथो मधेश आन्दोलन गर्न मधेशी समुदाय बाध्य हुने चेतावनी दिइएको छ ।

प्रतिनिधिसभाको बैठकमा बोल्दै राजपा सांसद लक्षमणलाल कर्णले चौथो मधेश आन्दोलनका लागि वाध्य नबनाउन सरकारलाई सचेत गराएका छन् ।

संविधान संशोधन, लाल आयोग प्रतिवेदन सार्वजनिक, लोकसेवा आयोगको विज्ञापन रद्दलगायतका माग गर्दै आएपनि सरकारले नसुनेको भन्दै चौथो मधेश आन्दोलनका लागि मधेशी समुदाय बाध्य हुने चेतावनी दिए ।

उनले संविधान विपरीत लोकसेवा आयोगको विज्ञापन निकालेर सरकारले मधेशी समुदायमाथि फेरी तरबार चलाउने काम गरेको आरोप लगाएका छन् । सरकारका मन्त्रीले संसदीय समितिको निर्देशन नमानेर समितिको धज्जी उडाउने काम गरेको भन्दै उनले आक्रोश पोखे ।

लाल आयोगको प्रतिवेदन सार्वजनिक नगरेर सरकार आफैले गरेको प्रतिबद्धताबाट पछि हटेको भन्दै उनले यसले जनताको सरकारमाथिको विश्वास टुटाउने काम गरेको टिप्पणी गरे ।

उनले सत्तारुढ दलका सांसदहरुलाई विधेयकमाथि दोहोरो चरित्र नदेखाउन पनि सचेत गराए । सरकारलाई लोकतन्त्रको हत्या गर्ने काममा उद्दत नहुन उनले सुझाव पनि दिए ।