'मन्त्री जीतेन्द्र सोनलका कार्यकर्ताहरु योजना खरिदविक्री गर्छन' : प्रदेश साँसद समिम

न्यूज ब्यूरो, जनकपुरधाम । प्रदेश नं. २ का भौतिक पूर्वाधार मन्त्री जीतेन्द्र सोनल भ्रष्टाचारमा लिप्त भएको बताइएको छ ।

प्रदेश नं. २ का प्रदेश साँसद एवम् सप्तरीको निर्वाचन क्षेत्र नं. ३ (क) को नेपाली काँग्रेसबाट निर्वाचित साँसद मो. समिमले मन्त्री सोनलका कार्यकर्ताहरु मात्र योजना खरिदविक्री गर्ने गरेको आरोप लगाएका छन् । न्यूज ब्यूरोसँग कुराकानी गर्दै साँसद समिमले प्रदेश सरकारका भौतिकपूर्वाधार मन्त्री सोनलले आफ्ना पार्टीका कार्यकर्ता तथा पार्टीसँग सम्बन्धित व्यक्तिलाई मात्र योजनाहरु दिने गरेको आरोप लगाए । सप्तरीमा मो. समिम नेपाली काँग्रेसका एक दिग्गज नेता मानिन्छ ।

मन्त्री सोनलकै कारण राजपाका दुई केन्द्रीय सदस्य जेल गएको दाबी गर्दै उनले मन्त्री सोनलको कार्यविधीको विरोधमा प्रदेश सभामा समेत आवाज उठाएको बताए । उनले भने, - "प्रदेश सरकारका भौतिक पूर्वाधार मन्त्री जीतेन्द्र सोनल जीलाई प्रदेश सभामै मुखमुखै भनेको थिए । केन्द्र सरकारले पनि ५२ करोड रुपैयाँ शसर्त अनुदान दिएको छ, त्यसमा पनि यीनीहरुले काम गराउन नसक्दा फ्रिज हुने अवस्था आईसकेको छ । यदि यो बजेट उपर अहिले पनि समयमै काम भएन भने फ्रिजै हुनेछ ।"

राजपाका दुई केन्द्रीय सदस्य जेल चलान

मन्त्री सोनलको कार्यनीति र भ्रष्टाचारको कारण उनकै पार्टीका आफ्नै दुई केन्द्रीय सदस्य जेल गएको जीकिर गर्दै प्रदेश सरकारले दिने गरेको योजनमा उनले लुट मच्चाएको बताए । मन्त्री सोनल प्रशितको आधारमा आफ्ना कार्यकर्ताहरुलाई मात्र योजना दिने गरेको आरोप लगाएका छन् ।

उनले भने,- "प्रदेश सरकारबाट बजेट विनियोजन गरेर मन्त्री जीले आफ्नै पार्टीका कार्यकर्तालाई उपभोक्ता समिति वा ठेकका दिएर प्रतिशतमा रकम लिने गरेको छ । जसकै कारण उनका दुई केन्द्रीय सदस्य जेल पनि गएकै हो ।"

किर्ते उपभोक्ता समिति गठन गरेर सरकारी कागज,सरकारी छाप र दस्तखत किर्ते गरेको आरोपमा पक्राउ परेका राजपाका दुई जना केन्द्रीय सदस्य कारागार चलान भएका छन् ।

पूर्व सासंद बीपी यादव र राजपाका केन्द्रीय सदस्य हरिनारायण मण्डल जेल चलान भएका हुन् । सप्तरी जिल्ला अदालतले किर्ते उपभोक्ता समिति गठन गर्ने विपी यादव र हरी मण्डललाई पुर्पक्षका लागि कारागार चलान गर्ने आदेश दिएको छ ।