शहिदनगरका प्रमुख प्रशासकीय अधिकृत झालाई सिडिओको सम्मान

न्यूज ब्यूरो, जनकपुरधाम । नगरको शिक्षा क्षेत्रलाई सबल पार्न तथा गुणस्तरीय शिक्षाको लागि अहम भूमिका निर्वाह गरेको भन्दै शहिदनगर नगरपालिकाका प्रमुख प्रशासकीय अधिकृत नन्द कुमार झालाई सम्मान गरिएको छ ।

धनुषाका प्रमुख जिल्ला अधिकारी प्रदीप कनेलले अधिकृत झालाई शहिदनगर नगरपालिका भित्र संचालित रहेको अवैद्य विद्यालयहरुलाई नियमन गरी नियन्त्रण गर्ने कार्यमा महत्वपूर्ण भूमिका निर्वाह गरेको भन्दै उनलाई जिल्ला प्रशासन कार्यालय धनुषाबाट सम्मान सहित कदरपत्र प्रदान गरिएको हो ।

कदरपत्रमा लेखिएको छ , यहाँले धनुषा जिल्ला स्थित कार्यरत शहिद नगर नगरपालिका क्षेत्र भित्र अवैद्य रुपमा सँचालित विद्यालयहरुलाई नियमन गरी नियन्त्रण गर्ने कार्यमा प्रभावकारी भूमिका निर्वाह गर्नु भएकोले कार्यालय प्रमुख तथा सुशासन इकाई प्रमुखहरुको नियमित मासिक बैठक २०७६ २ ५ १ को अवसरमा कदर पत्र सहित सम्मान गरिएको छ । ईमान्दारिता पारदर्शिता र जवाफदेहिताका साथ सुशासन कायम राख् सदैव यहाँ क्रियाशिल रहनु हुने विश्वास लिएको छ ।

कान्छो मेयरको 'शिक्षा माफिया विरुद्ध' को मिशन सफल, सिडिओले गरे प्रशंसा

केही दिनअघि नगर प्रमुख उदय कुमार बरबरियाको अवैद्य विद्यालय बन्द अभियानमा प्रमुख प्रशासकीय अधिकृत झाले कानुनन रुपमा अहम भूमिका निर्वाह गरेको ठहर गरिएको छ । नगर प्रमुख बरबरियाले पनि अधिकृत झाको भूमिकालाई कदर गरेका थिए ।

शहिदनगर नगरपालिकाको लेखा अधिकृतबाट प्रमुख प्रशासकीय अधिकृतको जिम्मेवारी सम्हालेका झाले छोटो समयमै नगर प्रमुख बरबरियाको मिशनमा सामेल भएर सम्मानित भएका हुन् । प्रमुख जिल्ला अधिकारीको हातबाट सम्मान पाउँदा निकै खुसी लागेको झाले बताए ।

न्यूज ब्यूरोसँग कुराकानी गर्दै अधिकृत झाले, नगरपालिकाको शिक्षा क्षेत्र सुधारको लागि नगर प्रमुख बरबरियाले चालेको पाईलामा पाईला मिलाएर नगरभित्रको अवैद्य विद्यालय तथा शिक्षा माफिया विरुद्ध एकजुट भएर काम गरेको अनुभूति सुनाए । नगरको शिक्षा सबल पार्नको लागि आफ्नो भुमिका झन तीव्र र कडा हुने उनले बताए ।

उनले शहिदनगरको जनताबाट पाएको शक्तिलाई उर्जामा परिणत गरी शहिदनगररको जनता जनार्दनको लागि सदैव तत्पर रहने आउने दिनमा पनि यस्ता अवैद्य गतिविधि विरुद्ध कडा रुपमा प्रस्तुत हुन उर्जा प्रदान भएको प्रतिक्रिया दिए ।

केही दिन सिडिओ कनेलले शहिदनगरका मेयर उदय कुमार बरबरियालाई पनि शिक्षा माफिया विरुद्ध कडा रुपमा प्रस्तुत भई एक उदाहरणीय कार्य गरेको भन्दै सम्मान गरेका थिए ।

जिल्ला प्रशासन कार्यालय धनुषाबाट झाले सम्मान पाएपछि उनलाई हरेक क्षेत्रबाट बधाईको ओईरो लागेको छ । उनलाई फेसबुक मेसेन्जर, स्टेटस सहित फोन मार्फत ईष्टमित्र तथा शुभचिन्तकहरुले बधाई दिएका छन् ।

यता, नगर प्रमुख उदय कुमार बरबरियाले समेत अधिकृत झालाई फेसबुक मार्फत बधाई ज्ञापन गरेका छन् । उनले आफ्नो नगरपालिकाका कर्मचारीले यत्रो ठुलो सम्मान पाउनुमा आफू पनि गौरवान्ति भएको बताए । झाको कार्यकाल आउने दिनमा अझ सफल रहने विश्वास लिएको उनले बताए ।