कान्छो मेयरको 'शिक्षा माफिया विरुद्ध' को मिशन सफल, सिडिओले गरे प्रशंसा

न्यूज ब्यूरो, जनकपुरधाम । मुलुकमै कान्छो मेयरको उपनामले चिनिएका धनुषा शहिदनगरका मेयर उदय कुमार बरबरिया (यादव) ले अवैद्य विद्यालय बन्द को मिशन सफल पारेका छन् ।

नगरभित्र अवैद्य रुपमा सँचालनमा रहेको १३ वटा विद्यालय बन्द गर्नको लागि मेयर बरबरियाको टीमले कडा रुपमा प्रस्तुत भएपछि नगरभित्रको १३ वटै अवैद्य विद्यालय बन्द गराइएको हो । सो क्रममा धनुषाका प्रमुख जिल्ला अधिकारी प्रदीप कनेलले मेयर बरबरियालाई खुलेर प्रशंसा गरेका छन् ।

सोमबार सिडिओ कनेलले कान्छोमेयरसँगको भेटमा उनले देखाएको साहस र उनको टीमले गरेको कार्यको खुलेर प्रशंसा गरे । यसका साथै प्रमुख जिल्ला अधिकारी कनेलले धनुषाका अन्य सबै स्थानीय तहहरुलाई शहिदनगर जस्तै अवैद्य सँस्थागत विद्यालय बन्द गराउनको लागि कान्छो मेयरको असल अभ्यासको अनुसरण गर्न पत्राचार समेत गरेका छन् ।

जिल्लाका शहिदनगर नगरपालिका बाहेक अन्य गाउँपालिका तथा नगरपालिकालाई पनि शहिदनगरका नगर प्रमुखझैं अवैद्य विद्यालय विरुद्धको अभियान चलाउन आग्रह गरिएको छ ।

जिल्ला प्रशासन कार्यालय धनुषाले स्थानीय तहहरुलाई काटेका पत्रमा - "मापदण्ड समेत नपुगेका, दर्ता गर्ने म्याद दिएर पनि दर्ता गर्न नआएका एवम् दर्ता नै नगरी गैर कानुनी रुपमा चलिरहेका सँस्थागत विद्यालयहरुलाई यस २०७६ को शैक्षिक सत्र देखि धनुषा स्थित शहिदनगर नगरपालिकाबाट पूर्ण रुपमा बन्देज लगाई शिक्षा क्षेत्रमा सुधार भएको असल अभ्यासलाई संवद्ध सबै स्थानीय तहले कडाईका साथ अवलम्बन गरी गराई यस कार्यालय समेतमा जानकारी दिनु हुन अनुरोध छ" - भनेर उल्लेख गरिएको छ ।

गृहमन्त्रालय, नीति योजना तथा अनुगमन शाखा, सिँहदरबार काठमान्डौँ , प्रदेश नं. २ को आन्तरिक मामिला तथा कानुन मन्त्रालय, समाजिक विकास मन्त्रालय, जिल्ला समन्वय समितिको कार्यालय र शिक्षा विकास तथा समन्वय इकाई धनुषालाई बोद्यार्थ गर्दै प्रजिअ कनेलले बाँकीका स्थानीय तहहरुको सबै वडाध्यक्ष, वडासचिव समेतको सहयोग समन्वय गरी अग्रिम कारवाही टुँग्याउन पत्राचार गरेको हो ।