अन्तरवार्ता प्रकरण : 'त्यस्ता मिडिया विरुद्ध निषेधात्मक कार्य गर्न बाध्य हुनेछौँ'

न्यूज ब्यूरो, जनकपुरधाम । नेपाल सरकारका उपप्रधान एवम् स्वास्थ्य तथा जनसँख्यामन्त्री उपेन्द्र यादव उपर एक टिभीका अन्तरवार्ता प्रस्तोताले दुरव्यवहार गरेको भन्दै कारवाहीको लागि माग गरिएको छ ।

समाजवादी पार्टी नेपालका प्रदेश नं. २ का अध्यक्ष विजय यादवले मँगलबार एक प्रेस विज्ञप्ति जारी गर्दै मन्त्री यादवलाई दुरव्यहार गर्ने पत्रकारलाई कारवाहीको लागि सम्बन्धित निकायसँग माग गर्दै त्यस्तो नगरे निषेधात्मक कार्य गर्न बाध्य हुने उल्लेख गरेका छन् ।

काठमान्डौंबाट प्रसारित हुने एभिन्यूज टेलिभिजनको एक अन्तरवार्ताको क्रममा अन्तरवार्ता लिने पत्रकारले असभ्य र अशिष्ट भाषाको प्रयोगका साथै मन्त्री यादवलाई अपमान गरेको भन्दै सम्बन्धित पत्रकारलाई कारवाहीको लागि प्रेस काउन्सिल नेपाल सँग माग गरेको हो ।

टिभी च्यानलको आग्रहलाई सहजै स्वीकार गरी अन्तरवार्ताको लागि तयार भएका उपप्रधान एवम् स्वास्थ्यमन्त्री उपेन्द्र यादवलाई सुनुयोजित तरिकाबाट मानमर्दन हुने गरी दुरव्यवहार गरेको आरोप लगाउँदै पूर्वाग्रही मानसिकताले ओतपोत भएर अन्तरवार्ता गरेको आरोप लगाइएको हो ।

राज्यको चौथो अंगको रुपमा स्थापित सँचार जगत आचार संहिता भित्र रहेर संयमित, मर्यादित र शिष्ट दंगले अगाडी बढनु आवश्यक देखिन्छ । देशको गरिमामय व्यक्तित्वलाई अभद्र व्यवहार गर्ने अशोभनीय प्रश्न सोध्ने र आपत्तिजनक शब्दहरुको प्रयोग गर्न पत्रकारको कृयाकलापले पूर्ण नियोजित रुपमा गरिएको हाम्रो ठहर छ । त्यसकारण सम्बन्धित पत्रकारलाई कारवाही नगरिए हामी त्यस्ता मिडिया विरुद्ध निषेधात्मक कार्य गर्न बाध्य हुनेछौं । भनेर जारी गरिएको प्रेस विज्ञप्तिमा उल्लेख गरिएको छ ।

समाजवादी पार्टी नेपालको तराई मधेश प्रदेश कमिटि अध्यक्ष एवम् प्रदेश नं. २ सरकारको आर्थिक मामिला तथा योजनामन्त्री समेत रहेका यादवका अनुसार सम्बन्धित पत्रकारलाई कारवाही प्रेस काउन्सिलले नगरे आगामी दिनमा यस्ता कार्यक्रम, समाचार, अन्तरवार्ताको लागि समय नदिने तथा कार्यक्रममा नजाने गरी निषेधात्मक कार्य गर्ने बताए ।

यता, एभिन्यूज टेलिभिजनका पत्रकार तथा उपप्रधामन्त्री उपेन्द्र यादवलाई अन्तरवार्ता लिने शुशिल पाण्डेलाई ज्यान मार्ने धम्की नदिएको दाबी गरिएको छ । पत्रकार पाण्डेले जारी गरेको धम्की दिने नम्बर ९८५१००५१८० समाजवादी पार्टी नेपालका केन्द्रीय सदस्य विष्णु जँग बस्नेतको भएपनि उनले कुनै धम्की नदिएको प्रतिक्रिया दिएका छन् ।

मँगलबार दिउँसो न्यूज ब्यूरोसँग कुराकानी गर्दै केन्द्रीय सदस्य बस्नेतले आफ्नो चरित्र हत्या गरेको भन्दै कारवाहीको लागि माग गरे । उनले भने, - "पत्रकार पाण्डेसँग बेला बेलामा कुरा भएकै हो, अन्य विषयहरुमा कुरा भएकै हो, तर मैले धम्की किन दिनुपरयो र ? मैले उहाँलाई मारिदिन्छु, तँ भेट कहाँ भेटछस्, यस्ता नीच शब्द प्रयोग गरेको भए नी धम्की हुने की त्यतिकै साधारण कुरा गर्दा आफूलाई धम्की दियो भनेर चरित्र हत्या गर्ने ?"

यता, पत्रकार शुशिल पाण्डले भने आफूलाई केन्द्रीय सदस्य बस्नेतले ज्यान मार्ने धम्की दिएको आरोप लगाएका छन् भने बस्नेतले त्यसलाई खण्डन गर्दै आफ्नो चरित्र हत्या गर्न खोजेको बताएका छन् ।

गत बैशाख २९ गते आईतबार काठमान्डौंको एभिन्यूज टेलिभिजनबाट प्रशासरण भएको लाईभ अन्रतवार्ताको क्रममा नेपाल सरकारका उपप्रधान एवम् स्वास्थ्य तथा जनसँख्यामन्त्री उपेन्द्र यादवलाई अन्तरवार्ता लिने क्रममा पत्रकार पाण्डेले बकवास नगर्नुस, जवाफ दिन सक्नुहुन्न भने जान सक्नुहुन्छ जस्ता शब्द प्रयोग गरेपछि विवाद भएको हो ।