मधेशमा महिलाहरुलाई ४५ प्रतिशत आरक्षण दिन्छौं : गृहमन्त्री यादव

न्यूज ब्यूरो, जनकपुरधाम । प्रदेश २ का आन्तरिक मामिला तथा कानून मन्त्री ज्ञानेन्द्र यादबले प्रदेश २ मा महिलालाई ४५ प्रतिशत आरक्षण दिने व्यवस्था गर्न लागेको बताएका छन् ।

मिथिला विहारी नगरपालिका १० ठेरामा आयोजित सरोकारबाला र सहकारीकर्मीहरु बीचको अन्तरक्रिया कार्यक्रममा बोल्दै मन्त्री यादबले पछाडी परेकी महिलालाई अगाडी ल्याउन आरक्षणको व्यवस्था गर्न लागेको बताए ।

उनले महिलाहरु आरक्षण पाएपछि हिंशा घट्ने पनि दावी गरे । उनले महिलाले हरेक क्षेत्रमा अवसर अव पाउने र सामाजिक, आर्थिक तथा सुरक्षामा सुधार आउने विश्वास व्यक्त गरे ।मन्त्री यादबले सहकारीले आर्थिक अवस्थामा सुधार ल्याउने भन्दै सदस्य बन्न आग्रह समेत गरेका छन् । उनले सहकारीका सदस्य भएर इमान्दारिताका साथ अगाडी बढे हरेक व्यक्तिको आर्थिक अवस्थामा सुधार आउने बताए ।

उनले यहाँका सहकारीहरु मिलेर एक बनेको र यसलाई व्यवस्थित रुपमा संचालन गर्न सकेमा प्रदेश सरकारले अनुदान समेत दिने र त्यसका लागि पहल गरिदिने प्रतिवद्धता जनाए ।

कार्यक्रममा सयौं महिलाहरुको उपस्थिति रहेको थियो । सहकारीसँग आवद्ध ति महिलाहरुलाई जिल्ला बचत तथा ऋण सहकारी संघ धनुषाका अध्यक्ष तथा राष्ट्रीय सहकारी बैंकका केन्द्रीय संचालक धु्रब नारायण यादबले सहजीकरण तथा तालिम दिएका थिए । संचालक यादबले सहकारीमा आवद्ध भएपछि आर्थिक रुपमा सबल बन्ने बताए ।

उनले भने, ‘एक्लैले न रुन सक्छ, न हाँस्न । अन्य काम त झन केहि गर्न सक्दैन । त्यसैले सहकारीमा सबै एक भएर लागेपछि निश्चित रुपमा प्रगति हुन्छ ।’ कार्यक्रमको अध्यक्षता आयोजक लवकुश बचत तथा ऋण सहकारी संस्थाकी अध्यक्ष सिता कुमारीले गरेकी थिइन् । जनकपुर टुडेमा समाचार छ ।