प्रदेश नं. २ को नाम 'मधेश' होईन 'मिथिला-भोजपुरा' ?

न्यूज ब्यूरो, जनकपुरधाम । नेपाली कांग्रेसका उपसभापति विमलेन्द्र निधिले सरकारको वार्षिक नीति तथा कार्यक्रम विभेदकारी रहेको आरोप लगाएका छन ।

नीति तथा कार्यक्रममा संघीयतालाई कार्यान्वयन गर्ने कुनै कार्यक्रम नरहेको उनले दावी गरे । नेपाल प्रेस युनियन धनुषाले मंगलबार जनकपुरधाममा आयोजना गरेको पत्रकार सम्मेलनमा उनले भने, ‘सरकारको नीति तथा कार्यक्रममा प्रदेश र स्थानीय तहलाई अधिकार सम्पन्न बनाउने कुनै कार्यक्रम छैन ।’

उपसभापति निधिले सरकारको नीति तथा कार्यक्रम अश्वासनको पोको मात्रै हो, कार्यक्रमविहीन र नीतिविहीन रहेको आरोप लगाउँदै सङ्घीयता र संविधान विरोधी नीति तथा कार्यक्रमले संविधान संशोधनको मुद्दालाई पनि गौण बनाएको बताए । उनले कम्युनिष्ट पृष्ठभूमि भएका दलहरुबिच एकता भएकाले उनीहरु पनि संविधान संशोधनका लागि गम्भिर हुन नसक्ने बताए । संविधान संशोधनलाई लिएर आन्दोलन गरिरहेको राजपा समेत संशोधनको मुद्दा बिर्सेको आरोप लगाए ।

उनले काङ्गे्रस अहिले पनि संविधान संशोधनको पक्षमा अडिग रहेको बताउँदै प्रदेश नं २ को नामाकरण मधेश नभई मिथिला–भोजपुरा राख्नुपर्ने धारणा राखे । हिमाल, पहाड, तराई जनजागरण अभियान वैशाख २५ गते बाट शुरु हुन लागेको विषयमा जानकारी गराउनका लागि आयोजित पत्रकार सम्मेलनमा उनले यस्तो आरोप लगाएका हुन् ।

सरकारको काम संघियता बिरोधी रहलासँ यस विषयमा जनतालाई जागृत बनाउनकै लागि अभियान संचालन गर्न लागिएको निधिले बताए । आजको जनकपुर टुडेमा समाचार प्रकाशित भएको छ ।