अन्ततः फोरम र नयाँ शक्तिको एकीकरण हुँदै, नयाँ पार्टीको नाम 'समाजवादी पार्टी नेपाल'

न्यूज ब्यूरो, जनकपुरधाम । उपेन्द्र यादव नेतृत्वको संघीय समाजवादी फोरम नेपाल र डा. बाबुराम भट्टराई नेतृत्वको नयाँ शक्ति पार्टीबीच अन्ततः एकीकरणको टुँगो लागेको छ ।

दुबै पार्टीबीच २३ गते सोमवार एकीकरणको घोषणा गर्ने तय गरिएको हो । शनिवार बसेको दुई पक्षको बैठकबाट नयाँ पार्टीको नाम समाजवादी पार्टी, नेपाल राख्ने सहमति भएको छ ।

फोरमका अध्यक्ष उपेन्द्र यादव र नयाँ शक्ति पार्टीका अध्यक्ष बाबुराम भट्टराईले शनिबार संयुक्त प्रेस विज्ञप्ति निकाल्दै पार्टी एकीकरणको घोषणा एक विशेष कार्यक्रमका बीच बैशाख २३ गते नेपाल प्रज्ञा प्रतिष्ठानमा हुने जनाएका छन् ।

पार्टीको अध्यक्षमा नेकपा मोडेलको यादव र भट्टराई दुबैजना रहनेछन् । विज्ञप्तिमा समाजवादी पार्टीले संघीय लोकतान्त्रिक गणतन्त्रलाई संस्थागत गर्दै नेपाली समाजमा विद्यमान जातीय, वर्गीय, लैंगिक र क्षेत्रीय असमानता, विभेद र शोषणको अन्त्य गरी संघीय लोकतान्त्रिक गणतन्त्र नेपालको समृद्धिका लागि भूमिका निर्वाह गर्ने उल्लेख छ ।

दुई पार्टीबीचको एकीकरण हुने चर्चा लामो समयदेखि नै चल्दै आएको थियो । व्यापक छलफल र विचार विमर्शपछि पार्टी एकीकरण गरी समाजवादी पार्टी नेपाल निर्माण गर्ने सहमति जुटाइएको विज्ञप्ति मार्फत जनाइएको छ ।