दानवताको पराकाष्ठा : सिरहामा एक महिलालाई मट्टीतेल छर्केर जलाइए, अवस्था गम्भीर !

न्यूज ब्यूरो, सिरहा । सिरहामा एक महिलालाई जिउँदै मट्टीतेल छर्केर आगो लगाइएको छ । घरायसी विवादमा बिहीवार सिरहाको कल्याणपुर नगरपालिका ८ अरङकी २१ वर्षीया कञ्चनदेवी मण्डल खत्वेलाई जीउमा आगो लगाएर जलाइएको हो ।

आगोले कञ्चनकी शरीरको ८० प्रतिशत भाग जलेको छ भने उनको अवस्था अहिले गम्भीर रहेको जनाइएको छ । बिहीवार विहान करिब ११ बजे घरायसी विवादमा उनी उपर मानवताको पराकाष्ठा नाघेर अत्याचार भएको हो ।

प्रहरीले घटनाबारे जानकारी पाएपछि तत्कालै कञ्चनलाई उद्धार गरेर उपचारको लागि विपी कोइराला विज्ञान प्रतिष्ठान धरान पठाएका थिए भने त्यहाँबाट पनि उनलाई काठमाडौं रिफर गरिएको छ । शरीरको अधिकांश भाग जलिसकेका कारण त्यहाँ उपचार सम्भव नभएपछि उनलाई उपचारको लागि काठमाडौं रिफर गरिएको अस्पताल श्रोतले जनाएको छ ।

घटनापश्चात घटनास्थल पुगेका सिरहा प्रहरीले कञ्चनकी सासुलाई नियन्त्रणमा लिएको छ भने उनको पति फरार रहेको सिरहा प्रहरीले जनाएको छ । उनको खोजी कार्य भइरहेको सिरहाका प्रहरी उपरीक्षक जीवन श्रेष्ठले जनाए ।

घटना कसरी भएको हो भन्नेबारे अहिले यकिन हुन नसकेको र कञ्चनकी सासुलाई नियन्त्रणमा लिई थप अनुसन्धान थालेको श्रेष्ठले जानकारी दिए ।

यसअघि मात्र गत वैशाख ५ गते धनुषाको शहिदनगर नगरपालिका १ पुरवारी टोल चिरैयाकी २० वर्षीया नवविवाहिता निर्मला यादवलाई पति मुकेश यादव गोइतले मट्टीतेल छर्केर जलाएको घटना सेलाउन नपाउँदै पुनः सिरहामा अर्को घटना भएको छ ।