रौतहट : प्रहरी प्रमुखमा खत्रीको 'ईन्ट्री' भएपछि तस्करमा खैलावैला

न्यूज ब्यूरो, रौतहट । रौतहटको सुरक्षा व्यवस्था कडा पारिएसँगै अवैध क्रियाकलाप, चोरी, तस्करी लगायतका कार्य गर्ने व्यक्ति र गिरोहमा हड्कम्प मचेको छ । प्रहरी प्रमुख भुपेन्द्र खत्रीको आगमन भएसँगै उनले चालेको कडा कदमले गलत क्रियाकलाप गर्ने गराउने दुबैमा हडकम्प र खैलाबैला मचेको हो ।

प्रमुख खत्रीको निर्देशनमै पहिलादेखि सिमा क्षेत्रबाट चल्दै आएको तस्करी, चोरि पैठारी जस्ता क्रियाकलापमा कमि आएको वुद्धिजिवीहरुको विश्लेषण छ । पहिला अपराध, चोरी तस्करी नै विभिन्न स्थानीय चौकीको इन्चार्जको मिलिभगतमा हुने गथ्र्यो । तर, प्रहरी प्रमुखमा खत्री आएपछि त्यस्ता कार्य न्यूनीकरण हुँदै गएको ब्रहमपुरीका स्थानीय समाजसेवी नवीन सिँह बताउछन् ।

बुधबार पनि जिल्ला प्रहरी कार्यालयले लाखौं मुल्य बराबरको तस्करीको सामान सहित बेबारिसे रुपमा फेला परेको पशुचौपाया समेत भन्सार कार्यालयमा बुझाइएको डिएसपी नवीन कार्कीले बताएका छन् । जिल्ला प्रहरी कार्यालय रौतहट तथा मातहत समेतबाट खटिएको प्रहरी गस्ती टोलिले जिल्लाको विभिन्न स्थानहरुबाट भन्सार छल्दै चोरी पैठारी गरी भारतबाट नेपाल भित्राइएका लत्ता कपडा, चप्पल, डिजल, दाल, चिनी बरामद गरिएको थियो ।

उक्त सामाग्री र बेवारिसे अवस्थामा फेला परेको भैसी र पाडा समेत गरी करिब ४ लाख २४ हजार ७ सय ७५ रुपैयाँ बराबरको धनमाल आवश्यक कारबाहीको लागी भन्सार कार्यालय गौरमा बुझाइएको कार्कीले जनाए ।