जनमतको जनपरिचालन तीव्र, सदस्यताको लागि हजारौँले भरे रुची फारम

न्यूज ब्यूरो, सिरहा । डा. सिके राउत नेतृत्वको जनमत पार्टीमा सदस्यता लिनको लागि हजारौँको सँख्यामा युवाहरुले अभिरुची फारममा दिलचस्पी देखाएका छन् । सिरहा जिल्लाबाट मात्रै १० हजार बढीले फारमको लागि अभिरुची देखाएका छन् ।

मूलधारको राजनीतिमा प्रवेश गरेपनि डा. राउतको समर्थकहरुमा भने कमि नभएको दाबी गरिएको छ । जनमत पार्टीको जनपरिचालन समिति व्यापक रुपमा निर्माण थालिएको छ ।

जनवर्गीय संगठन निर्माण तथा नगरपालिका र गाउँपालिकामा जनमत पार्टी विस्तारको कार्य तीव्र रुपमा भइरहेकोे जनाइएको छ । जनमत पार्टीको आउँदो ३० गते मिर्चौयामा हुन लागेको आमसभालाई लक्षित गरी हरेक नगरपालिका र गाउँपालीकामा जनपरिचालन समिति गठन भईसकेको केन्द्रीय नेता सुदिपराज कुशवाहाले जनाएका छन् ।

कुशवाहाका अुनसार, सिरहा जिल्लामा १० औं हजारको सँख्यामा जनमत पार्टीको सदस्यता अभिरुचि फारम भरेका छन् । जनमत पार्टीको नरहा गाउपालिका भेलामा वडा प्रतिनिधिहरुसँग छलफल गरी रंजित यादवको संयोजकत्वमा जनपरिचालन समिति गरिएको छ ।

जनमत पार्टीले स्थानीय स्तरमा प्रशिक्षण तथा आगामी रणनीति बिषयमा समेत छलफल जारी राखेको छ । जनमत पार्टीका नेताहरु गाउँगाउँमा पुगेर जनमत अभियानमा सक्रिय देखिएका छन् ।