आँधी पीडितलाई वर्षा अगावै 'प्रिफ्याब घर' बनाइदिने मधेश सरकारको निर्णय

न्यूज ब्यूरो, जनकपुरधाम । प्रदेश २ सरकारले आँधी प्रभावितहरुका लागि चाँडै नै प्रि–फ्याब घर बनाइदिने भएको छ । मधेशकै बारा, पर्सा लगायतका जिल्ला गत १७ गते राती आएको बिनासकारी हावाहुरीका पीडितहरुलाई वर्षा अगावै अवास बनाइदिने निर्णय गरेको हो ।

हिजो बसको प्रदेश सरकारको राहत तथा उद्धार व्यवस्थापन उच्चस्तरीय समितिको बैठकले बेघर बनेका सर्वसाधारणहरुको यस्तो निर्णय गरेको प्रदेश २ का मुख्य न्यायाधिवक्ता एवं समितिका सदस्य दिपेन्द्र झाले जानकारी गराएका छन् । उनले तत्कालका लागि त्रिपाल, टेन्ट लगायतको अस्थायी सेल्टरहरु बनाइने जनाए ।

दीर्घकालीन पुनर्स्थापनाका लागि भने पूर्ण रुपमा घर क्षति भएका पीडितहरुलाई एकनासको प्रि–फ्याब घर बर्षा सुरु हुनु अगाडि चार महिनाभित्रै तयार पार्ने निर्णय गरिएको छ ।

प्रदेश सरकारले बनाइदिने भनेको प्रिफ्याब घर कस्तो हुन्छ भन्ने सार्वजनिक गरिएको छैन । तर, भूकम्प प्रभावितहरुले पनि प्रिफ्याब घर बनाएका थिए, जुन भुइँतले हुन्छ ।

यस्तै, समितिको बैठकले राहत वितरणलाई व्यवस्थित बनाउन सहायता कक्ष स्थापना गर्ने निर्णय समेत गरेको छ ।

यसअघि प्रदेश २ सरकारले घटनामा मृत्यूवरण गरेकाहरुको परिवारलाई ३ लाख आर्थिक सहयोगसहित घाईतेहरुको उपचार पनि व्यहोर्ने घोषणा गरेको थियो ।