बारा, पर्सामा राहत बाँडे डा. सिके राउत : भने,-'नेताको घोषणा नै खाएर पेट भर्छ ?'

न्यूज ब्यूरो, जनकपुरधाम । जनमत पार्टीका अध्यक्ष डा. सिके राउतले हुरी प्रभावित बारा र पर्सामा राहत बाँडेका छन् ।

बिनासकारी आँधीका पीडितहरुलाई मलहमपट्टी गर्न डा. ग्राउन्ड जिरोमा गएका डा. राउत अवस्थाबारे बुझ्दै राहत समेत वितरण गरेका हुन् ।

उनले केन्द्र तथा प्रदेश सरकारका मन्त्रीहरु एवं ठूलठूला नेताहरूमा सहयोग घोषणाको होडबाजी चलेको र घोषणामै समिति गरेको भन्दै दु:ख व्यक्त गरे ।

डा. राउतले घाईतेहरुको उपचारका लागि सरकारले प्रयाप्त औषधि र सुविधा उपलब्ध गराउन नसक्दा बढी ब्यक्तिले मृत्यूवरण भोग्नुपरेको तेर्साए ।

उनले आफ्नो फेसबूक पेजमा पीडितहरुले गरेको गुनासोको भिडियोसहित लेखेका छन्, 'केन्द्र सरकारमा पनि तपाईं, प्रदेश सरकारमा पनि तपाईं, स्वास्थ्मन्त्री पनि तपाईंको, अनि दोष कसको? मृत्युको जिम्मेवारी कस्को? बेथितिको जिम्मेवारी कस्को?

४-५ गुणा कर बढाई गरिब जनताबाट छाला काढेर असुल गरेको पैसाबाट मृतकको परिवारलाई ३ लाख बाँड्ने घोषणा गरेर क्वाटरमा मस्त आराम गर्दैमा प्रदेश सरकारको दायित्व सिद्धिन्छ?

अस्पतालमा बिरामी औषधी नपाएर मरिरहेका छन्, कुरुवा दिनभरि भोक भोकै बसेका छन्, घरबारविहीन भएका हजारौ हजार जनता राती कहाँ सुत्ने थाहा छैन, तिनका बच्चाहरु के खान्छन् थाहा छैन, अनि केन्द्र र प्रदेशका मन्त्रीहरु सत्ता भत्तामा रमाउदै मिडियामा आफ्नो स्तुति गान लेख्न लाएर पुग्छ? राति पिडित जनतालाई के घोषणा खाएर नै पुग्छ?'

डा. राउतले सबैलाई ग्राउन्ड जिरोमा आएर बाराको विकराल अवस्थाबारे अनुगमन गर्न आग्रह गरेका छन् ।