जनकपुर सहित प्रदेशको विभिन्न जिल्लामा विद्यार्थीहरुको प्रदर्शन र चक्काजाम !

न्यूज ब्यूरो, जनकपुरधाम । गत आईतबारदेखि सँचालन भएको एसईई परीक्षा २०७५ को तीन विषयको परीक्षापछि अन्य परीक्षाहरु स्थगित गरेपछि विद्यार्थीहरु आन्दोलित भएका छन् ।

संघीय सरकारका शिक्षा, विज्ञान एवम् प्रविधि मन्त्री गिरिराजमणि पोखरेलले प्रदेश नं. २ को एसईई परीक्षा आगामी चैत्त २२ गतेदेखि सुचारु गर्ने निर्णय गरे लगत्तै शिक्षामन्त्री पोखरेलको विरोधमा विद्यार्थीहरु जनकपुर लगायत प्रदेशको विभिन्न स्थानमा प्रदर्शनका साथै चक्काजाम गरेका छन् ।

यसैक्रममा जनकपुरको विभिन्न चोकहरुमा टायर बालेर प्रदर्शन गरेका छन् भने जनकपुर देखि करिब १६ किलोमिटरको दुरीमा रहेको महेन्द्रनगमा समेत चक्काजाम गरेका छन् । उनीहरु परीक्षा रद्द तथा स्थगितको विरोध जनाउँदै विहानैदेखि जनकपुर महेन्द्रनगर सडकखण्डमा चक्काजाम गरेका छन् । चक्काजामका कारण सवारी साधनको आवागमन समेत ठप्प भएको हो ।

उनीहरुले आफूहरुको जीवनसँग गम्भिर खेलवाड गरेको भन्दै शिक्षामन्त्री हाय हाय, शिक्षामन्त्री मुर्दावाद को नारा सहित क्षीरेश्वरनाथ नगरपािलकाका मेयर योगेन्द्र पंजियारको घर अगाडी समेत प्रदर्शन गरेका छन् । नगरको मेयरको हैसियतले परीक्षार्थीहरु निकास र न्यायको आसामा मेयर घर अगाडी पुगेका छन् ।

स्थानीय प्रहरी र सरोकारबालाको पहलमा तत्कालै चक्काजाम खुलाइएको बताइएको छ भने प्रदर्शन अझ जारी राखेका छन् । यसका साथै जलेश्वर बर्दिवास सडकखण्डमा समेत विद्यार्थीहरु आगो बालेर प्रदर्शन गरिरहेका छन् ।