विदेह नगरपालिकाका शिक्षकहरुलाई क्षमता अभिवृद्धि गरिदै

न्यूज ब्यूरो, जनकपुरधाम । पूर्वी धनुषाको गिद्धाबेलापट्टिमा स्थानीय शिक्षकहरुलाई क्षमता अभिवृद्धि गरिने भएको छ ।

विदेह नगरपालिकाको तिनकौरियाचोकमा अवस्थित जनता माध्यमिक विद्यालय गिद्धाबेलापट्टिमा सोमबारदेखि नगरस्तरीय योजनामा शिक्षकहरुलाई क्षमता अभिवृद्धि हेतु विषयगत शिक्षक क्षमता अभिवृद्धि तालिमको उद्घाटन गरिएको हो । विद्यालयका प्रधानाध्यापक पवन मण्डलको अध्यक्षता एवम् नगरका मेयर बेचन दासको प्रमुख आतिथ्यमा सम्पन्न भएको ३ दिने तालिमको उद्घाटन सत्रमा नगरभित्रको सबै विद्यालयका विषयगत शिक्षकहरुलाई सहभागी गराइएको हो ।

न्यूज ब्यूरोसँग कुराकानी गर्दै प्रधानाध्यापक एवम् कार्यक्रमका अध्यक्षता गरेका शिक्षक पवन मण्डलले भने, विदेह नगरपालिकाको निम्न माध्यमिक विद्यालय र माध्यमिक विद्यालयका शिक्षहरुलाई ३ दिने तालिममा सहभागी गराएका छौं । सोमबारदेखि सुरु भएको यो तालिम बुधबारसम्म चल्नेछ । यसमा गिद्धाबेलापट्टि, बफै, गोबराही र ठाढी विद्यालयका शिक्षकहरु सहभागी भएका छन् ।

नगरस्तरीय कार्यक्रम अन्तर्गत उक्त विद्यालयहरुबाट जम्मा ३३ जना विषयगत शिक्षकहरुलाई सहभागीता गराइएको प्रधानाध्यापक मण्डलले बताए । उनले विषयगत शिक्षक तालिम पश्चात नगरभित्रको उक्त निमावि, मावीमा शैक्षिक अवस्थामा सुधारको साथै अतिरिक्त क्रियाकलाप र विद्यार्थीहरुलाई पढाउने शैलीमा विकास हुने विश्वास उनले लिए ।