धनुषाको सबैलामा युवा उद्यमशिलता तालिम शुरु

न्यूज ब्यूरो, धनुषा । धनुषाको सबैला नगरपालिकामा शुक्रबारदेखि युवा उद्यमशिलता तालिम सुरु गरिएको छ ।

सबैला नगरपालिकाको सहयोग तथा समाजिक सँस्था दलित युवा सञ्जाल केन्द्रको सहकार्यमा तीन दिने युवा उद्यमशिलता तथा वितिय साक्षरता तालिम सुरु गरिएको हो । नगरका युवाहरुलाई खर्चको मापदण्ड र दैनिक आर्थिक अवस्था सहित बैँक र वितिय ज्ञानको बारेमा तालिम सुरु गरिएको हो ।

समाजिक सँस्था दलित युवा सँजाल केन्द्र धनुषाको अध्यक्ष विशेश्वर मण्डलको अध्यक्षता एवम् नगरपालिकाका नगर प्रमुख विजय शँकर प्रसाद साहको प्रमुख आतिथ्यमा भएको उद्घाटन सत्रमा बोल्दै मेयर साहले भने, -"युवाहरुलाई दैनिक आम्दानी र खर्च तथा बैँक र नियमहरुबारे तालिम नभएकै कारण पनि गरिबीका रेखामुनी आउन बाध्य भएको देखिएको छ । नगरको मेरुदण्ड युवाहरु नै हुन, यिनीहरुले वित्तिय साक्षरताको तालिमपछि आम्दानी र खर्च सहित बैँक र ऋणबारे वृहत जानकारी प्राप्त गरी व्यवहारमा लागु गर्नेछ भन्ने विश्वास छ ।"

नगरपालिकाले नगरकै जनताहरुको लागि बजेट विनियोजन गरेको भन्दै मेयर साहले यसबाट नगरका युवाहरुले चारैतर्फबाट फाईदा उठाउनुपर्ने बताए । युवाहरुलाई रोजगारी सृजना गर्न र बचत गर्न पनि तथा परिवारको जीवनशैली परिवर्तनको लागि युवाहरुले यो तालिम पश्चात केही हदसम्म व्यवहारमा लागू गर्न सके नगर समृद्धिको बाटो हिडने दाबी गरे ।

सो कार्यक्रममा सबैला नगरपालिका वडा नं. १२ का वडाध्यक्ष सहित सहभागी युवाहरु, प्रशिक्षकहरुको समेत सहभागिता रहेको थियो । शुक्रबारदेखि सुरु भएको तिनदिने तालिमको आईतबार समापन गरिने जनाइएको छ ।